: नेपाली कम्युनिस्ट पार्टीका नेता पुष्पकमल दाहाल प्रचण्डले अहंकार त्यागेर सबैलाई साथमा लिएर अघि बढ्न प्रधानमन्त्रीलाई सुझाव दिएका छन्। बुधबार प्रतिनिधि सभा बैठकमा प्रचण्डले संकटको घडीमा राष्ट्रलाई एकजुट बनाउने मुख्य जिम्मेवारी प्रधानमन्त्रीकै भएकाले अहंकार त्यागी सबैलाई मिलाएर अगाडि बढ्न आग्रह गरेका हुन्।
उनले संकटको समयमा जनताले आश्वासन र सामाजिक सञ्जालको पोस्ट नभई कार्यक्षेत्रमा सरकारको प्रत्यक्ष उपस्थिति खोजेको धारणा राखे। अहिलेको अवस्थामा सेना परिचालन मात्र गरेर नपुग्ने भन्दै प्रचण्डले जनपरिचालन र तीनै तहका सरकारबिच प्रभावकारी समन्वय नभएसम्म विपद्को समाधान कठिन हुने उल्लेख गरे।
सुरुवाती दिनको तदारुकता र पछिल्लो चरणको कार्यशैलीमा विरोधाभास देखिएको तथा कार्यक्षेत्रमा सरकार उद्धार कार्यमा असफल भएको जनगुनासो व्यापक रूपमा उठेको उनले बताए। उनले सुरुङ उद्धारमा दुई दिनसम्म 'हामी आफैँ गर्छौँ' भन्ने महत्त्वाकांक्षा र अहंकार देखाउँदा ढिलाइ भएको र अन्त्यमा सुरक्षा निकायले हात उठाउनुपर्ने स्थिति बनेको जिकिर गरे।
उनले विदेशी तथा प्राविधिक विज्ञहरूले सहयोग गर्छौँ भन्दा पनि सरकारले समयमै तत्परताका साथ सहयोग जुटाउन नसकेको तथा सबै दलहरूले सरकारलाई साथ दिन्छौँ भनिरहँदा पनि प्रधानमन्त्रीले प्रतिपक्ष तथा आफ्नै दलका सांसदहरूलाई समेत विश्वासमा लिन नसकेको उनको टिप्पणी थियो।
