। दक्षिण कोरियाली अभिनेता जंग इल-वू नेपालमा भीषण बाढीबाट प्रभावित नागरिक र बालबालिकाको सहयोगमा जुटेका छन् ।
गुड नेबर्सले बुधबार अभिनेता इल-वूले नेपालमा बाढीपछिको पुनस्र्थापना र विस्थापित पीडितलाई सहयोग गर्न आर्थिक सहयोग प्रदान गरेको जनाएको छ । उक्त रकम नुवाकोट र गोरखासहित बाढीबाट बढी प्रभावित क्षेत्रमा आपतकालीन राहतका लागि प्रयोग गरिनेछ ।
प्रभावित नागरिकलाई स्थानीयस्तरमै सहयोग उपलब्ध गराउने काम यसअघि नै सुरु भइसकेको छ । गुड नेबर्सले बाढी प्रभावित नुवाकोटका विस्थापित नागरिकलाई खाद्यान्न, अत्यावश्यक घरायसी सामग्री र सरसफाइका सामग्री उपलब्ध गराउँदै आएको छ ।
संस्थाले बाढी प्रभावित बालबालिकाको पुनस्र्थापनामा पनि सहयोग गरिरहेको छ । यसका लागि बालमैत्री स्थल स्थापना गर्नुका साथै बालबालिकालाई मनोसामाजिक सहयोग उपलब्ध गराइएको छ ।
यो सहयोगसँगै जंग इल-वू गुड नेबर्सको विशेष दाता समूह ‘द नेबर्स क्लब’का सदस्यसमेत बनेका छन् । वार्षिक कम्तीमा १० मिलियन वन सहयोग गर्ने र निरन्तर सहयोगको अभ्यास गर्ने सदस्यहरू यस समूहमा आबद्ध हुन्छन् ।
जंग इल-वूले भने, ‘अचानक आएको बाढीबाट पीडित भएका नागरिक र बालबालिकालाई थोरै भए पनि सहयोग पुर्याउन चाहन्छु ।’ उनले अघि भने, ‘प्रभावित क्षेत्र सकेसम्म चाँडो पुनस्र्थापित होस् र त्यहाँका मानिस शान्तिपूर्ण दैनिक जीवनमा फर्कन सकून् भन्ने मेरो हार्दिक कामना छ ।’
अभिनेता इल-वूको सहयोगले अचानक आएको प्राकृतिक विपद्का कारण घर र जीविकोपार्जन गुमाएका नेपाली नागरिक तथा बाढी प्रभावित बालबालिकाको पुनस्र्थापनामा सहयोग पुगेको छ । गुड नेबर्सले पनि प्रभावित क्षेत्रको अवस्था निगरानी गर्दै आपतकालीन राहत तथा बालबालिका सहायता कार्यक्रमलाई निरन्तरता दिने योजना बनाएको छ ।
