: मोरङमा १० वर्षअघि भएको सामूहिक बलात्कार (जबरजस्ती करणी) घटनामा सर्वोच्च अदालतले दोषी ठहर गरेका चारमध्ये एक जना अभियुक्त पक्राउ परेका छन् भने दुई जनाले अदालतमा आत्मसमर्पण गरेका छन्। एक जना भने अझै फरार छन् ।
मोरङ प्रहरी प्रमुख एसपी कवित कटवालका अनुसार कटहरी गाउँपालिका–६ का ३० वर्षीय अजय पासवानलाई विराटनगर महानगरपालिका–७ स्थित सहिद रंगशाला नजिकबाट आइतबार साँझ पक्राउ गरिएको हो । ‘मन्त्री’ भनेर चिनिने पासवान सर्वोच्च अदालतबाट दोषी ठहर भएपछि लामो समयदेखि फरार थिए। पक्राउ परेका उनी विराटनगरस्थित नोबेल अस्पताल नजिकै फार्मेसी सञ्चालन गरेर लुकिछिपी बस्दै आएको खुलेको एसपी कटवालले बताए।
सामूहिक बलात्कार मुद्दामा अजय पासवानसहित चार जनालाई सर्वोच्च अदालतले २०८२ साल असार १० गते दोषी ठहर गर्दै प्रतिव्यक्ति नौ वर्ष कैद सजायको फैसला सुनाएको थियो। न्यायाधीशद्वय हरिप्रसाद फुयाल र टेकप्रसाद ढुंगानाको संयुक्त इजलासले जिल्ला अदालत मोरङ र उच्च अदालत विराटनगरको फैसला उल्टाउँदै चारै जनालाई दोषी ठहर गरेको हो।
सर्वोच्चको फैसलापछि फरार रहेका अजय पक्राउ परेपछि घटनामा दोषी ठहर भएका अरु दुई जना अभियुक्त आफैं अदालत पुगेका हुन्। कटहरी गाउँपालिका–४ का राजा भनिने राजेश कामत र करिया भनिने रविन कामतले सोमबार जिल्ला अदालत मोरङमा आत्मसमर्पण गरेका छन्।
दुवैले सर्वोच्चको फैसला कार्यान्वयन गराउन माग गर्दै जिल्ला अदालतमा निवेदन दिएका थिए। अदालतका सूचना अधिकारी हेमबहादुर बुढाथोकीका अनुसार प्रहरीले पक्राउ गरेर बुझाएका एक जना र आफैं अदालतमा उपस्थित भएका दुई जनासहित तीनै जनालाई कैद सजाय भुक्तानका लागि सोमबार कारागार चलान गरिएको छ । ‘सर्वोच्च अदालतबाट दोषी ठहर भएको लामो समयसम्म फरार रहेका एक जनालाई प्रहरीले पक्राउ गरेर बुझाएको हो । अरु दुई जना आफैं निवेदन लिएर अदालतमा आएका हुन्,’ बुढाथोकीले भने। प्रहरीका अनुसार पासवान पक्राउ परेपछि आफूहरू पनि पक्राउ पर्न सक्ने देखेर राजेश र रविन अदालतमा आत्मसमर्पण गर्न पुगेका हुन्। सर्वोच्चको फैसला कार्यान्वयनका लागि उनीहरूले स्वेच्छाले अदालतमा उपस्थित भएर कैद भुक्तानको प्रक्रिया अघि बढाएका छन् । मुद्दामा दोषी ठहर भएका अर्का अभियुक्त सुजित चौधरी भने अझै फरार छन् । उनको खोजी भइरहेको प्रहरीले जनाएको छ।
यो मुद्दाको फैसला कार्यान्वयनमा पुग्नुअघि लामो कानुनी प्रक्रिया गुज्रिएको थियो। २०७३ सालमा भएको घटनामा संलग्न चारै जना त्यतिबेलै पक्राउ परेका थिए। उनीहरूलाई अदालतको आदेशबाट पुर्पक्षका लागि जिल्ला कारागार मोरङमा राखिएको थियो । तर, जिल्ला अदालतले सफाइ दिएपछि उनीहरू थुनामुक्त भएका थिए।
मोरङ जिल्ला अदालतका तत्कालीन न्यायाधीश नारायणप्रसाद पराजुलीको इजलासले २०७४ जेठ ४ गते अभियुक्तहरूलाई सफाइ दिएको थियो। त्यसविरुद्ध पुनरावेदन परेकोमा उच्च अदालत विराटनगरका तत्कालीन न्यायाधीशद्वय प्रेमराज कार्की र महेश शर्मा पौडेलको संयुक्त इजलासले २०७५ चैत ५ गते जिल्ला अदालतकै फैसला सदर गरेको थियो।
यसरी जिल्ला र उच्च अदालतबाट सफाइ पाएका चारै जना वर्षौंसम्म बाहिरै रहे। तर, अन्तिम तहको सुनुवाइ गर्दै सर्वोच्च अदालतले दुवै अदालतको फैसला उल्टाएर चारै जनालाई दोषी ठहर ग¥यो । सर्वोच्चले प्रतिव्यक्ति नौ वर्ष कैद सजाय तोकेपछि उनीहरू फरार भएका थिए।
घटना भने त्यसको झन्डै १० वर्षअघि भएको थियो। २०७३ साल माघ १० गते राति कटहरी गाउँपालिका–१ स्थित माछा पोखरीको डिलमा १९ वर्षीया युवती बेहोस अवस्थामा भेटिएकी थिइन्। ७–८ जनाको समूहले युवतीमाथि सामूहिक बलात्कार गरी बेहोस अवस्थामा छाडेको सूचना प्रहरीलाई प्राप्त भएको थियो।
प्रहरी घटनास्थल पुग्दा युवती पोखरीको डिलमा राखिएको फलामको खाटमाथि अचेत अवस्थामा भेटिएकी थिइन् । तत्कालीन प्रहरी नायब निरीक्षक (सई) देवेन्द्र सुवेदीको नेतृत्वमा पुगेको प्रहरी टोलीले उनलाई उद्धार गरी उपचारका लागि विराटनगरस्थित कोशी अस्पताल पु¥याएको थियो। उपचार तथा स्वास्थ्य परीक्षणका क्रममा युवतीमाथि सामूहिक बलात्कार (जबरजस्ती करणी) भएको खुलेपछि प्रहरीले घटनामा संलग्नहरूको खोजी तीव्र बनाएको थियो। त्यसक्रममा प्रहरीले घटनास्थल नजिकै रहेको धर्मकाँटाको कार्यालय कोठामा लुकेर बसेका नौ जनालाई २०७३ साल माघ ११ गते बिहान पक्राउ गरेको थियो।
प्रहरीले सुरुमा नौ जनालाई पक्राउ गरे पनि अन्ततः यही घटनामा चार जना अभियुक्तविरुद्ध दोष कायम भएको हो । उनीहरूलाई जिल्ला अदालतले सफाइ दिएपछि उच्च अदालतले पनि जिल्लाकै निर्णय सदर गरेको थियो । लामो कानुनी प्रक्रियापछि सर्वोच्च अदालतले भने चारै जनालाई दोषी ठहर गर्दै नौ–नौ वर्ष कैदको फैसला सुनाएको हो। सर्वोच्चको फैसला कार्यान्वयनको क्रममा अहिले एक जना पक्राउ, दुई जनाको आत्मसमर्पण र एक जना फरार रहेको अवस्था छ। प्रहरीले फरार रहेका अभियुक्त सुजित चौधरीको खोजी भइरहेको जनाएको छ।
