। त्रिशूली–थ्री ‘ए’ आयोजनाको सुरुङमा फसेका कर्मचारीहरूको उद्धारका लागि परिचालित टोलीले रातभरि काम गर्ने भएको छ ।
फिल्डमै रहेको एक स्रोतका अनुसार सुरुङ फेला परेपनि त्यसभित्र गएर उद्धार गर्नसक्ने बाटो बनाउन रातभरि खन्ने कामलाई निरन्तरता दिइनेछ ।
तीन दिनदेखि निरन्तर उद्धारमा खटेको टोलीले ‘केबल एक्सेस टनेल’ फेला पारेको थियो । त्यो सुरुङबाट उद्धार टोलीले बिजुली बाल्ने तथा भित्र फसेका मानिसहरूको संकेत लिने प्रयास गरेपनि हालसम्म कुनै संकेत प्राप्त नभएको स्रोत बताउँछ ।
यस्तो अवस्थामा उद्धार टोलीले रातभर कामलाई निरन्तरता दिने निर्णय गरेको हो । राति सुरुङमा खन्ने कामसँगसँगै भेन्टिलेसन र अक्सिजन टनेलभित्र पठाउने काम समानान्तर रूपमा गरिने उद्धार टोलीले जनाएको छ ।
सँगसँगै उद्धारकर्ता भित्र प्रवेश गर्नका लागि घस्रिएर जानसक्ने बाटो (क्राबल–थ्रु प्यासेज) बनाइने पनि जनाइएको छ ।
सो बाटो हुँदै सुरुङको स्ल्याबको माथिबाट घसँ्रदै डक्टको माथिल्लो भागसम्म पुग्ने र भित्रको अवस्था निरीक्षण गर्ने योजना पनि उद्धार टोलीको छ ।
यसरी उद्धारको पहुँच बनाउन सम्भव भएन भने भोलि बिहान सबेरै नेपाली सेनाले नियन्त्रित बिष्फोट गराई सुरुङको मुख खोल्ने योजना पनि टोलीले बनाएको छ ।
अहिले यो आयोजनामा नेपाली सेना, नेपाल विद्युत् प्राधिकरणको टिम तथा सुरुङ विज्ञहरूको टोलीले काम गरिरहेको छ । सांसद् तथा सुरुङविज्ञ श्रीराम न्यौपाने उद्धार क्षेत्रमै बसेर यो प्रक्रियाको समन्वय गरिरहेका छन् ।
यसअघि उद्धार टोलीले भित्र हावा पठाउन ड्रिल गरेर पाँचवटा प्वाल बनाएको थियो ।
नेपाल विद्युत् प्राधिकरणका अनुसार परियोजनाको सुरुङमा फसेका कर्मचारीको उद्धारको काम बाढी गएको दुई दिनपछि शुक्रबारमात्रै थालिएको थियो ।
पाँच दिनसम्म पनि सुरुङ छिचोल्न नसकिएकाले भित्र फसेका जीवनको बारेमा चिन्ता थपिँदै गएको अधिकारीहरू बताउँछन् ।
आयोजनाको जमिनमुनि रहेको विद्युत् गृहको ओभरहलिङमा त्यहाँ करिब ४०–४२ जना उच्च विज्ञसहितको प्राविधिक जनशक्तिले काम गरिरहेको र उनीहरू सुरुङभित्र फसेको अनुमान विद्युत् प्राधिकरणको छ ।
