। नेकपा एमालेले रसुवामा गएको विनाशकारी बाढीका कारण उत्पन्न परिस्थितिमा सरकारले तत्काल गर्नुपर्ने ८ काम औंल्याएको छ ।
भदौ १० गते रसुवाको भोटेकोशी नदीमा भीषण बाढी गएको थियो । उक्त बाढीबाट रसुवा, नुवाकोट, धादिङलगायतका जिल्लाहरूका रसुवागढी, टिमुरे, स्याफ्रुवेशी, मैलुङ, बेत्रावती, त्रिशुली, ढुंगे, देवीघाट लगायतका बस्तीहरूमा ठूलो मानवीय तथा भौतिक क्षति पुगेको छ ।
ती क्षेत्रको स्थलगत निरीक्षणका लागि एमालेका महासचिव शंकर पोखरेलको नेतृत्वमा एक टोली भदौ ११ गते नै नुवाकोटतर्फ प्रस्थान गरेको थियो । टोलीमा नेताहरू विष्णु रिमाल, राजन भट्टराई, कृष्णगोपाल श्रेष्ठ, विशाल भट्टराई, पार्वत गुरुङ, विनोद श्रेष्ठ, निरज आचार्य, अमित लामा लगायत गएका थिए ।
टोलीले स्थलगत निरीक्षण तथा घाइतेसँग भेटघाट गरेको थियो ।
टोलीले बाढीबाट अत्यधिक प्रभावित बनेको विदुर नगरपालिकास्थित ढुंगे बजार क्षेत्रको प्रत्यक्ष स्थलगत अवलोकन गरेको थियो ।
यसैगरी, स्थानीय अस्पताल पुगी बाढीका घाइतेहरूको स्वास्थ्य अवस्थाबारे जानकारी लिनुका साथै देवीघाट बजार क्षेत्रको बाढीग्रस्त अवस्थाको समेत निरीक्षण गरेको थियो ।
साथै, महासचिव पोखरेलले बाढीले अति प्रभावित जिल्ला रसुवाकाबारे उपलब्ध ब्यक्तिहरु संग जानकारी लिएका थिए ।
यसआधारमा एमालेले ‘राहत/उद्धारसम्बन्धी सुझाव प्रतिवेदन’ तयार पारेको छ ।
जसमा सरकारले तत्काल गर्नुपर्ने ८ काम औंल्याइएको छ–
१. एकीकृत कमान्ड पोस्ट : तीनवटै सुरक्षा निकाय र स्थानीय जनप्रतिनिधिहरूलाई समेटेर तुरुन्त एकीकृत ‘कमान्ड पोस्ट’ निर्माण गर्ने,
२. वैकल्पिक पहुँच : मुख्य सडक नजोडिएसम्म वैकल्पिक माध्यम (जस्तै: तुइन, फलामे डोरी वा साना अस्थायी पुल) मार्फत जोखिममा रहेका क्षेत्रहरूमा खानेपानी, औषधि र खाद्यान्न पुर्याउने ।
३. सडक खुलाउने र बेलिब्रिज : स्थलमार्ग खुलाउन निजी क्षेत्रका ठूला हेभी इक्युपमेन्टहरू (उपकरणहरू) परिचालन गरी युद्धस्तरमा काम गर्ने तथा नदी एवं ठूला खोलाहरूमा तत्काल बेलिब्रिज जडान गर्ने ।
४. टोखा शिवपुरी लिखु तादी सूर्यगडी– सरनथलि हुँदै नवकुण्ड कालिका धुन्चे सडक मर्मत गरी सञ्चालनमा ल्याउने । लिखु सूर्यगढी निस्केर जाने बाटो यस्को अर्को विकल्पको रुपमा प्रयोग गर्ने ।
५. धादिङवाट मध्यपहाडी राजमार्ग वाट किस्पाङ, तारकेश्वर हुदै रसुवा जाने बाटो ममर्त गरी शीघ्र सञ्चालनमा ल्याउने ।
६. खोजी कार्यमा तीव्रता: डुबान क्षेत्रको भग्नावशेष र दलदलमा दबेका शवहरूको खोजी कार्यलाई तीव्रता दिन थप जनशक्ति र आधुनिक उपकरण परिचालन गर्ने । जलविधुत आयोजनाका सुरुङमा फसेका देशी तथा विदेशी कामदारहरुको शीघ्र उद्धार गर्ने ।
७. नागरिक स्वयंसेवक परिचालन: राहत र उद्धारका लागि सुरक्षा निकायका अतिरिक्त कामको प्रकृतिका आधारमा नागरिक स्तरबाट स्वयंसेवकहरूलाई तत्काल परिचालन गर्ने ।
८. भोटेकोशी तथा त्रिशुली बाढीमा परी मृत्यु भएका र हराएकाहरुको स्मृतिमा पार्क निर्माण गर्ने ।
मानवीय संकटको यस घडीमा राजनीति गर्ने वा प्रक्रियागत विलम्ब गर्ने छुट कसैलाई नरहेको भन्दै एमालेले सरकारको ध्यानाकर्षण गरेको छ ।
यस्तो सुझावसहितको प्रतिवेदन तयार पारेर निरीक्षण टोलीले आइतबार पार्टी अध्यक्ष केपी शर्मा ओलीलाई बुझाएको छ ।
प्रतिवेदनमा विपदेग्रस्त क्षेत्रको यथार्थ र सरकारी संयन्त्रको उपस्थितिबीच ठूलो खाडल रहेको भनेर पनि औंल्याइएको छ ।
