: मध्य अफ्रिकी गणतन्त्र (सीएआर) को पश्चिमी क्षेत्रस्थित क्यामरुन सीमा नजिकै एउटा सुनखानी भासिँदा कम्तीमा १ सय भन्दा बढी मानिसको मृत्यु भएको छ।
स्थानीय सञ्चारमाध्यम तथा क्यामरुनको गारुआ-बुलाई शहरका मेयर अदमो अब्दोनका अनुसार यो दुर्घटना मंगलबार अपरान्ह बाबुआ शहरबाट करिब ५० किलोमिटर टाढा रहेको जाम्बोए गाउँमा भएको हो।
उद्धार कार्यमा खटिएका रेडक्रसका स्वयम्सेवक गेर्भिस गानागोरोह, स्थानीय खानी सङ्घका वरिष्ठ अधिकारी र अन्य स्थानीय स्रोतहरूले १०० भन्दा बढी शवहरू निकालिसकिएको पुष्टि गरेका छन्, भने उद्धार कार्य अझै जारी छ। मृतकमध्ये कम्तीमा तीन जना क्यामरुनका नागरिक रहेको र उनीहरूको शव अन्तिम संस्कारका लागि स्वदेश पठाइएको छ।
सहरका अधिकारी बर्ट्रान्ड बी याङ्गका अनुसार धेरै मानिसहरू अझै बेपत्ता र भग्नावशेषमुनि थिचिएकाले मृतकको सङ्ख्या अझै बढ्न सक्ने अनुमान गरिएको छ।
घाइतेहरूलाई उपचारका लागि बाबुआ शहरको अस्पताल लगिएको छ। दुर्घटनामा बाँच्न सफल श्रमिक सेड्रिक म्बाङ्गोले जमिन अचानक भासिएपछि धेरै मानिसहरू मलबेभित्र पुरिएको र घटना अत्यन्तै विपत्तिजनक रहेको बताएका छन्। बाबुआका सरकारी वकिलले खानीभित्रका धेरै वटा भूमिगत सुरुङहरू एकैपटक धंसिएकाले यो पहिरो गएको बताएका छन्। यस घटनाको वास्तविक कारण पत्ता लगाउन न्यायिक छानबिन सुरु गरिएको छ।
मध्य अफ्रिकी गणतन्त्रमा परम्परागत रूपमा गरिने साना खानी उत्खनन धेरै परिवारको जीविकोपार्जनको मुख्य स्रोत भए तापनि सरकारी नियन्त्रण बाहिर रहेका यस्ता खानीहरूमा सुरक्षा उपकरण र पर्याप्त सुरक्षा व्यवस्था नहुने भएकाले बारम्बार जोखिमपूर्ण दुर्घटनाहरू हुने गर्छन्।
