: सिकार खेल्ने क्रममा गोली लागेर कैलालीमा एक जनाको मृत्यु भएको छ। बर्दगोरिया गाउँपालिका–३ स्थित लालिगुराँस सामुदायिक वनमा भरुवा बन्दुकको गोली लागेर ४३ वर्षीय पदमबहादुर विश्वकर्माको मृत्यु भएको हो।
भदौ २ गते दिउँसो सिकार खेल्ने क्रममा कृष्णबहादुर बुढा क्षेत्रीले जंगली बँदेललाई गोली हान्ने क्रममा विश्वकर्माको दाहिने छातीमा लागेको प्रहरीले जनाएको छ। घाइते विश्वकर्माको उपचारका लागि लैजाने क्रममा मृत्यु भएको थियो ।
घटनापछि शवलाई जंगलमै राखेर भागेपछि मृतकका भाइ गणेश विश्वकर्माले दिएको जाहेरीका आधारमा कृष्णबहादुर बुढा क्षेत्री र राकेश डगौरा थारुलाई प्रहरीले पक्राउ गरेको छ ।
अनुसन्धानका क्रममा प्रहरीले दुई थान भरुवा बन्दुकसमेत बरामद गरेको छ । घटनाबारे थप अनुसन्धान भइरहेको छ ।
