। क्यानडा क्रिकेट टोलीका मुख्य प्रशिक्षक मोन्टी देशाई पदबाट बाहिरिएका छन् । देशाई नेपाली क्रिकेट टोलीका पनि पूर्वप्रशिक्षक हुन् ।
क्यानडाले मे महिनामा दोस्रोपटक देशाईलाई मुख्य प्रशिक्षक नियुक्त गरेको थियो । उनले आईसीसी क्रिकेट विश्वकप लिग–२ अन्तर्गत घरेलु मैदान र स्कटल्यान्डमा भएका दुई त्रिकोणात्मक सिरिजमा टोलीको जिम्मेवारी सम्हालेका थिए ।
लिग–२ मा चार खेल बाँकी रहँदा क्यानडा शीर्ष चारभन्दा ६ अंकले पछाडि छ । त्यसैले सन् २०२७ एकदिवसीय विश्वकपको यात्रामा टोली विश्वकप क्वालिफायर प्ले–अफ खेल्ने अवस्थामा पुगेको छ ।
देशाईले सामाजिक सञ्जालमार्फत आफ्नो बिदाइको पुष्टि गर्दै यो छोटो तर अर्थपूर्ण अध्याय रहेको बताएका छन् ।
‘छोटो अध्याय थियो, तर निकै अर्थपूर्ण। दिगो सफलता समय, विश्वास, तयारी, बलियो सम्बन्ध र सामूहिक जिम्मेवारीबाट निर्माण हुन्छ भन्ने मेरो विश्वास अझ बलियो भएको छ। खेलाडी, सहयोगी स्टाफ र यो यात्रामा साथ दिने सबैलाई धन्यवाद’ देशाईले लेखेका छन् ।
देशाईसँग दुई दशकभन्दा बढीको अन्तर्राष्ट्रिय प्रशिक्षण अनुभव छ । उनले यूएई, अफगानिस्तान, नेपाल र क्यानडाको राष्ट्रिय टोली सम्हालिसकेका छन् ।
नेपालमा उनको कार्यकाल विशेष सफल मानिन्छ। देशाईकै प्रशिक्षणमा नेपालले क्रिकेट विश्वकप लिग–२ मा ऐतिहासिक पुनरागमन गर्दै एकदिवसीय विश्वकप छनोटमा स्थान बनाएको थियो ।
उनले २०२४ टी–२० विश्वकपमा पनि नेपालको मुख्य प्रशिक्षकका रूपमा टोलीको नेतृत्व गरेका थिए ।
यसैबीच क्रिकेट क्यानडाले ५ दिनअघि १५ अगस्टमा नै प्रशिक्षक पदका लागि आवेदन खुलाएको देखिएको छ ।
