। अस्ट्रेलिया क्रिकेट टोलीका पूर्व ब्याट्सम्यान डेभिड वार्नरलाई मदिरा गरी सवारी चलाएको (ड्रिंक–ड्राइभिङ) मामिलामा एक हजार ५०० अस्ट्रेलियन डलर (करिब १ लाख रुपैयाँ) जरिवाना गरिएको छ ।
यससँगै शरीरमा मदिराको मात्रा रहेको पत्ता लगाएमा कार स्टार्ट हुनबाट रोकिने इन्टरलक उपकरण कारमा जडान गर्न पनि आदेश दिइएको छ ।
वार्नरले गत अप्रिलमा सिड्नीमा मदिरा सेवन गरी सवारी चलाएको आरोप स्वीकार गरेका थिए ।
इस्टर सन्डेको एउटा कार्यक्रममा सहभागी भएर आफ्नो परिवारका सदस्यलाई घर लैजाँदै गर्दा उनी चेकिङमा परेका थिए । वार्नरले सडक किनारमा प्रहरीको जाँच भइरहेको देखेपछि आफ्नो कार रोकेका थिए । त्यसपछि उनले एक महिलासँग सिट साट्ने प्रयास समेत गरेका थिए ।
परीक्षण गर्दा उनको रगतमा मदिराको मात्रा तोकिएको सीमाभन्दा दुई गुणाभन्दा बढी पाइएको थियो । अदालतमा सुनुवाइका क्रममा वार्नरले आफूले मदिरा पिएर कार चलाएको स्वीकार गरेका थिए ।
त्यसपछि न्यायाधीश क्लेयर फार्ननले वार्नरलाई जरिवाना तोकेकी थिइन् । साथै वार्नरले भविष्यमा यस्तो गल्ती नगर्ने अपेक्षा आफूले गरेको बताएकी थिइन् ।
वार्नरले सन् २०२४ मा अन्तर्राष्ट्रिय क्रिकेटबाट सन्यास लिएका थिए । उनी हाल फक्स स्पोर्ट्स अस्ट्रेलियाका लागि कमेन्टेटरका रूपमा काम गरिरहेका छन् । वार्नर पाकिस्तान सुपर लिगको टोली कराची किङ्स र बिग बास लिगको सिड्नी थन्डरका कप्तानसमेत हुन् ।
