। एसीसी प्रिमियर कपको तयारीका लागि भारतमा रहेको नेपाली क्रिकेट टोलीले कर्नाटकसँगको पहिलो अभ्यास खेलमा ११६ रनको शानदार जित हासिल गरेको छ ।
नेपालले दिएको १८९ रनको लक्ष्य पछ्याएको कर्नाटक २८ ओभरमा ७२ रनमै समेटियो । कर्नाटकका लागि शरथ श्रीनिवासले सर्वाधिक ३२ रन बनाए । उनले ६५ बलमा ३ चौका प्रहार गरे । रेवन्थ बैरीले १० रन र सन्तोष सिंहले ९ रन जोडे ।
अन्य ब्याटरहरू सस्तैमा आउट भए । लोचन गौडा २ रन, तुषार सिंह ०, समर्थ श्रीनिवास ०, सञ्जय अश्विन १, ऋतेश भटकल ६, सागर गौतम ०, कीर्ति एम ३ र आदित्य गोयल ६ रनमा आउट भए ।
नेपालका बलरहरूले उत्कृष्ट प्रदर्शन गरे । करण केसीले ५ ओभरमा ९ रन खर्चेर २ विकेट लिए । ललित राजवंशी, शेर मल्ल र बसिर अहमदले पनि २-२ विकेट लिँदा सन्दीप लामिछानेले १ विकेट लिए ।
त्यसअघि टस जितेर पहिले ब्याटिङ गरेको नेपालले ४५ ओभरमा सबै विकेट गुमाउँदै १८८ रन बनाएको थियो ।
नेपालका लागि आसिफ शेखले सर्वाधिक ४९ रन बनाए । उनले ७० बलमा २ चौका र १ छक्का प्रहार गरे । ओपनर देव खनालले ४३ बलमा ५ चौकासहित २७ रन बनाए भने इशान पाण्डेले ४९ बलमा ३ चौकासहित ३४ रनको योगदान दिए ।
सन्दीप जोराले ३७ बलमा २ चौकासहित २७ रन बनाए । बशिर अहमद २७ बलमा १९ रन बनाएर अविजित रहे । गुलशन झाले १६ बलमा ११ रन जोडे ।
रोहित पौडेल भने ८ बलमा ४ रन बनाएर आउट भए । करण केसी ७ बलमा खाता खोल्न नसकी पेभेलियन फर्किए । सन्दीप लामिछानेले ७ बलमा २ रन बनाए भने शेर मल्लले २ बलमा १ रन बनाए ।
नेपालको सुरुवात भने राम्रो रहेन । अर्जुन कुमाल चार बल सामना गरेर शून्य रनमै आउट भए । त्यसपछि आसिफ, देव र इशानले इनिङ सम्हाल्दै नेपाललाई प्रतिस्पर्धात्मक योगफलतर्फ अघि बढाएका थिए ।
कर्नाटकका लागि कीर्ति एमले उत्कृष्ट बलिङ गर्दै ८ ओभरमा २० रन खर्चेर ५ विकेट लिए । आदित्य गोयल, अरविन्द कुमार राई, चिरन्त शिवरुद्र, सागर गौतम र समर्थ श्रीनिवासले समान एक–एक विकेट लिए ।
एसीसी प्रिमियर कपअघि नेपाली टोलीले तयारीस्वरूप कर्नाटकसँग अभ्यास खेल खेलिरहेको हो ।
