। फिफाका प्रमुख सञ्चालन अधिकृत (सीओओ) केभिन लामौरलाई विश्व फुटबलको सर्वोच्च निकायले पदबाट हटाएको छ । फिफाको विवादास्पद ‘फिफा फवार्ड इन्टरप्राइज’ (एफएफई) योजनाको कडा आलोचना गरेको तीन साताभन्दा कम समयमै लामौर बर्खास्तीमा परेका हुन् ।
फिफाले सोमबार लामौरसँगको प्रमुख सञ्चालन अधिकृतका रूपमा काम गर्ने सम्बन्ध १७ अगस्ट २०२६ देखि अन्त्य भएको पुष्टि गरेको छ । फिफाका महासचिव माटियास ग्राफस्ट्रोमले कर्मचारी तथा फिफा काउन्सिलका सदस्यलाई पठाएको सन्देशमा संस्था र लामौरले आपसी सहमतिमा अलग हुने निर्णय गरेको उल्लेख गरेका छन् ।
तर लामौरको बर्खास्तगी फिफा अध्यक्ष जियानी इन्फान्टिनोको विवादास्पद व्यावसायिक योजनाको आलोचनासँग जोडिएको हुन सक्ने आशंका गरिएको छ । फिफाले भने उनको बर्खास्तगीको कारण खुलाएको छैन ।
गत महिना लामौरले इन्फान्टिनोको नेतृत्वमा अघि बढाइएको एफएफई योजनाको सार्वजनिक रूपमा आलोचना गरेका थिए । उनले उक्त योजनालाई ‘एक व्यक्तिको परियोजना’ भन्दै फिफाको प्रशासन नै त्यसबाट ‘छलिएको’ बताएका थिए ।
एफएफईमार्फत विश्वकपसहित फिफाका सबै प्रतियोगिताको व्यावसायिक तथा टिकट बिक्री अधिकार व्यवस्थापन गर्ने र कम्पनीको २१ प्रतिशत हिस्सा निजी लगानीकर्तालाई बिक्री गर्ने योजना अघि सारिएको थियो ।
तर युरोपेली फुटबल महासंघ (यूईएफए), उत्तर तथा मध्य अमेरिकी फुटबल महासंघ (कनकाकाफ) र एसियाली फुटबल महासंघ (एएफसी) सहित विभिन्न पक्षबाट चर्को विरोध भएपछि योजना स्थगित गरिएको थियो ।
लामौरले फिफाको प्रशासनमा कार्यरत सयौं कर्मचारी फुटबलको सेवामा समर्पित रहेको भन्दै अध्यक्षले सबैलाई एकताबद्ध गर्नुपर्नेमा अहिले त्यसको ठीक विपरीत अवस्था देखिएको टिप्पणी गरेका थिए ।
उनले आफ्नो रोजगारदाताप्रतिको जिम्मेवारीसँगै केही निश्चित मूल्य र आफ्ना सहकर्मीप्रतिको जिम्मेवारी पनि रहेको बताएका थिए । त्यस क्रममा उनले आफ्नो आलोचनाका कारण जागिर गुमाउनुपरे पनि त्यसलाई स्वीकार गर्ने बताएका थिए ।
फिफाभित्रै बढेको विवाद
एफएफई योजनाको विरोध फिफाभित्र मात्र सीमित थिएन । यूईएफएले योजना अघि बढे विश्वकप बहिष्कारसम्म गर्ने चेतावनी दिएको थियो । योजना अन्ततः रोकिएपछि यूईएफए र कनकाकाफले आगामी मार्चमा हुने फिफा अध्यक्षको निर्वाचनमा इन्फान्टिनोलाई दिँदै आएको समर्थनसमेत फिर्ता लिएका छन् ।
इन्फान्टिनो चौथोपटक फिफा अध्यक्ष बन्ने तयारीमा छन् । यद्यपी अफ्रिका, दक्षिण अमेरिका र ओसियानाका फुटबल महासंघले उनको उम्मेदवारीलाई समर्थन गरेका छन् । मेक्सिकोसहित कनकाकाफका केही सदस्य राष्ट्रले भने आफ्नै महासंघको निर्णयविपरीत इन्फान्टिनोलाई समर्थन गरेका छन् ।
यसै क्रममा बेलायतका फुटबल संघहरू पनि इन्फान्टिनोको समर्थनबाट पछि हटिरहेका छन् । स्कटल्यान्ड पछिल्लो समय इन्फान्टिनोलाई समर्थन नगर्ने घोषणा गर्ने संस्था बनेको छ । यसअघि इंग्ल्यान्ड, वेल्स, उत्तरी आयरल्यान्ड र आयरल्यान्डले पनि समर्थन फिर्ता लिइसकेका छन् ।
यूईएफएबाट फिफासम्मको यात्रा
लामौरले सन् २०२४ नोभेम्बरमा फिफाको प्रमुख सञ्चालन अधिकृतको जिम्मेवारी सम्हालेका थिए । त्यसअघि उनी यूईएफएका उपमहासचिवका रूपमा कार्यरत थिए । फिफामा उनी इन्फान्टिनोभन्दा दुई तह तलको व्यवस्थापकीय भूमिकामा थिए ।
एफएफई योजनाको आलोचना गरेपछि इन्फान्टिनोका वरिष्ठ सल्लाहकार कार्लोस कोर्डेरोले पनि राजीनामा दिएका थिए । यसले फिफाभित्र अध्यक्षको व्यावसायिक तथा प्रशासनिक निर्णयलाई लिएर असन्तुष्टि बढेको संकेत गरेको थियो ।
लामौरलाई हटाइएको विषयमा फिफाले उनको दुई वर्षको सेवाका लागि धन्यवाद दिँदै भविष्यका लागि शुभकामना दिएको छ । लामौरसँग भने यस विषयमा प्रतिक्रिया मागिएको छ ।
यसैबीच, फुटबल प्रशासनमा पारदर्शिता र जवाफदेहिताका लागि काम गर्ने संस्था फेयरस्क्वायरले इन्फान्टिनोलाई आगामी निर्वाचनमा उम्मेदवार बन्न नदिन माग गर्दै फिफालाई पत्र पठाएको जनाएको छ ।
