। स्पेन तथा बार्सिलोनाका पूर्व मिडफिल्डर सर्जियो बुस्केट्स प्रशिक्षक करिअर सुरु गर्न आफ्नो पुरानो क्लब बार्सिलोनामा फर्किएका छन् ।
३८ वर्षीय बुस्केट्सले स्पेनको चौथो श्रेणीमा रहेको बार्सिलोना रिजर्भ टोली ‘बार्सा एथलेटिक’मा प्रशिक्षक जुलियानो बेलेत्तीको स्टाफका रूपमा काम गर्नेछन् । उनले प्रशिक्षकका लागि आवश्यक लाइसेन्ससमेत पूरा गर्नेछन् ।
बार्सिलोना एथलेटिक पछिल्लो समय लगातार कमजोर प्रदर्शन गर्दै दोस्रो श्रेणीबाट दुई तह तल झरेर सेगुन्डा फेडेरासियोनमा पुगेको छ । बेलेत्ती र बुस्केट्सको मुख्य लक्ष्य टोलीलाई तेस्रो श्रेणीमा फर्काउनुका साथै पहिलो टोलीका लागि प्रतिभावान् युवा खेलाडी विकास गर्नु हुनेछ ।
बुस्केट्स सन् २००५ मा किशोर खेलाडीका रूपमा बार्सिलोनाको एकेडेमीमा आबद्ध भएका थिए । सिनियर टोलीमा स्थान बनाउनुअघि उनले रिजर्भ टोलीका लागि २५ खेल खेलेका थिए । त्यसपछि पेप ग्वार्डिओलाको प्रशिक्षणमा बार्सिलोनाको मुख्य टोलीमा स्थान बनाएका उनले क्लबका लागि ७२२ खेल खेले ।
बार्सिलोनाका लागि सर्वाधिक खेल खेल्नेमा बुस्केट्सभन्दा अघि लियोनल मेसी र जाभी हर्नान्डेज मात्रै छन् । उनले क्लबबाट नौपटक ला लिगा र तीनपटक च्याम्पियन्स लिगसहित थुप्रै उपाधि जितेका थिए ।
स्पेनका लागि १४३ खेल खेलेका बुस्केट्स सन् २०१० को विश्वकप र २०१२ को युरोपियन च्याम्पियनसिप जित्ने टोलीका महत्वपूर्ण सदस्य थिए ।
बार्सिलोना छाडेपछि उनी सन् २०२३ मा इन्टर मियामी पुगेका थिए । त्यहाँ उनले पूर्व बार्सिलोना सहकर्मी तथा निकट साथीहरू लियोनल मेसी, जोर्डी अल्बा र लुइस सुवारेजसँगै खेले ।
इन्टर मियामीका लागि ११६ खेल खेलेका बुस्केट्सले २०२३ मा लिग्स कप र २०२५ मा एमएलएस कप जितेपछि खेलाडी जीवनबाट सन्यास लिएका थिए ।
अब बार्सिलोनाको युवा टोलीबाटै उनले आफ्नो प्रशिक्षक करिअरको सुरुवात गर्ने भएका छन् ।
-ईएसपीएनबाट
