: पर्साको जगरनाथपुर गाउँपालिका-४ बाट ५ महिनाअघि प्रहरीले नियन्त्रणमा लिएको गाँजासहितको ट्याक्टर प्रकरणको अनुसन्धानका लागि प्रहरीले एक जना कारोबारीलाई पक्राउ गरेको छ।
प्रहरीले अनुसन्धानका क्रममा पटेर्वासुगौली गाउँपालिका-१ सोनवर्षाका हयात अन्सारीलाई नियन्त्रणमा लिएको हो। उनलाई ईलाका प्रहरी कार्यालय पटेर्वा सुगौलीको टोलीले गत शुक्रबार नियन्त्रणमा लिएर सोही कार्यालयमा राखेको छ।
गत फागुन २६ गते जगरनाथपुर गाउँपालिका–४ बाट २ सय १३ केजी गाँजासहित मे १ त ५७१४ नम्बरको ट्याक्टर प्रहरीले नियन्त्रणमा लिएको थियो। त्यसबेला ट्याक्टरका चालक र तस्करहरू फरार भएकाले पक्राउ गर्न नसकिएको प्रहरीले जनाएको थियो।
उक्त ट्याक्टरको धनी खोजी तथा अनुसन्धानका क्रममा हयात अन्सारीलाई नियन्त्रणमा लिइएको ईलाका प्रहरी कार्यालय पटेर्वा सुगौलीका प्रहरी निरीक्षक समुन्नत अधिकारीले पुष्टि गरे। उनले भने, 'शंका लागेर उनलाई अनुसन्धानका लागि ल्याइएको हो। बरामद ट्याक्टरका धनीको नाम खुल्न बाँकी रहेकाले यातायात व्यवस्था कार्यालयसँग समन्वय भइरहेको छ।'
प्रहरी स्रोतका अनुसार मकवानपुरको मनहरीका एक गाँजा कारोबारीलाई लेनदेन विवादमा सोनवर्षाका समसुल र हयात लगायतका व्यक्तिहरूले ५–७ दिनदेखि सोनवर्षामै बन्धक बनाएर राखेका थिए। त्यसपछि मनहरीका ती कारोबारीकी पत्नीले प्रहरीमा उजुरी दिएकी थिइन्। सोही उजुरीका आधारमा खटिएको प्रहरी टोलीले ती कारोबारीको उद्धार गरी पत्नीको जिम्मा लगाएर घर पठाएको थियो भने हयातलाई नियन्त्रणमा लिएको थियो।
ईलाका प्रहरी कार्यालयका प्रहरी निरीक्षक अधिकारीले भने, 'अपहरण वा बन्धक नै बनाएको भने होइन। लेनदेनको विवादमा ती व्यक्तिलाई सोनवर्षास्थित एक कुखुरा फार्ममा राखिएको रहेछ। हामीले उनलाई श्रीमतीको जिम्मा लगाएर घर पठायौँ र हयात अन्सारीलाई अनुसन्धानका लागि हिरासतमा राखेका छौँ।'
मकवानपुरको पहाडी भेगमा उत्पादित गाँजा र चरेस भरियामार्फत पर्सा राष्ट्रिय निकुञ्जको बाटो हुँदै पर्साको सोनवर्षा, सुवर्णपुर, विजयबस्ती लगायतका गाउँमा ल्याएर भण्डारण गर्ने गरिन्छ। त्यहाँबाट रातिको समयमा मोटरसाइकल तथा ट्याक्टरमा लोड गरी भारततर्फ तस्करी हुने गरेको छ। साथै पटेर्वासुगौली गाउँपालिकाको रंगपुरगादी र सोनवर्षामा गाँजा कारोबारीहरूको जमघट हुने र गाँजाकाे आर्थिक लेनदेन हुने गरेको स्थानीयले बताएका छन्
