: त्रिभुवन अन्तर्राष्ट्रिय विमानस्थलबाट विदेशी मुद्रासहित दुईजना पक्राउ परेका छन्। नेपाल एयरलाइन्सको उडान नम्बर आरए ४१५ मार्फत काठमाडौंबाट क्वालालम्पुर जान लागेका उनीहरूलाई प्रहरीले पक्राउ गरेको हो।
विमानस्थल सुरक्षा कार्यालयका अनुसार पक्राउ पर्नेमा काठमाडौं महानगरपालिका–२६ सामाखुसी बस्ने ४५ वर्षीय जननी बज्राचार्य र गोरखा नगरपालिका–३ बस्ने ३५ वर्षीय ममता पाण्डे रहेका छन्। उनीहरू दुवैजना नेपाल एयरलाइन्सका कर्मचारी हुन्। पाण्डे सिनियर लेखा अधिकृत हुन् भने बज्रचार्य जुनियर लेखा अधिकृत हुन्।
प्रहरीका अनुसार बज्राचार्यको साथबाट ४ हजार ३०० अमेरिकी डलर बरामद भएको छ। त्यस्तै,पाण्डेको साथबाट ४ हजार २०० अमेरिकी डलर बरामद भएको हो।
विमानस्थलमा जाँचका क्रममा उनीहरूको साथबाट विदेशी मुद्रा फेला परेको हो। आवश्यक अनुसन्धान तथा कानुनी कारबाहीका लागि दुवैजनालाई बरामद मुद्रासहित पुल्चोकसहित सम्पत्ति शुद्धीकरण अनुसन्धान विभाग पठाइएको प्रहरीले जनाएको छ।
