: वैयक्तिक गोपनीयतासम्बन्धी कसूरको आरोपमा पक्राउ परेका जनआस्था साप्ताहिकका सम्पादक किशोर श्रेष्ठले दायर गरेको बन्दीप्रत्यक्षीकरणको रिटमाथि आज सर्वोच्च अदालतमा सुनुवाइ हुँदैछ। रिटको पेशी न्यायाधीश नहकुल सुवेदी र बालकृष्ण ढकालको संयुक्त इजलासमा तोकिएको छ।
यसअघि साउन २९ गते सर्वोच्च अदालतले श्रेष्ठलाई भदौ १ गते अदालतमा उपस्थित गराउन आदेश दिएको थियो। सोही आदेश अनुसार प्रहरीले श्रेष्ठलाई अदालतमा उपस्थित गराएको हो।सर्वोच्चले श्रेष्ठको कार्यालय तथा घरबाट बरामद सामान पनि अदालतमा पेश गर्न आदेश दिएको हो।
प्रहरीले श्रेष्ठलाई साउन २७ गते राति पक्राउ गरेको थियो। पक्राउलगत्तै प्रहरीले उनको घरमा छापा मारेर ल्यापटपलगायत महत्वपूर्ण कागजात नियन्त्रणमा लिएको बताइएको छ।
रिटमा काठमाडौं जिल्ला अदालत र जिल्ला प्रहरी परिसर,भद्रकालीलाई विपक्षी बनाइएको छ। श्रेष्ठमाथि अनुसन्धानका लागि जिल्ला अदालतले गत बिहीबार तीन दिनको म्याद थप गरेको थियो। उनी हाल प्रहरी हिरासतमा छन्।
