: पश्चिमी कोलम्बियामा ७.४ म्याग्निच्युडको भूकम्प गएपछि उद्धार टोलीहरू भग्नावशेषमा फसेका मानिसको खोजी र शव निकाल्न दिनरात खटिएका छन् । सरकारी तथ्यांकअनुसार शक्तिशाली भूकम्पका कारण देशभर कम्तीमा २५४ जनाको मृत्यु भएको छ । मृतकमध्ये अधिकांश पेरेइरा र काली सहरका छन् ।
कालीका २२ वर्षीय पत्रकारिता विद्यार्थी लुइस साएन्जले भने, ‘मेरो लागि भूकम्प कहिल्यै अन्त्य नहुने जस्तो लागेको थियो ।’ सोमबार बिहान ७ः३४ बजे भूकम्प जाँदा साएन्ज घरमा बिहानको कफी पिइरहेका थिए । भूकम्प सुरु भएपछि उनको बिरालो खाटमुनि लुकेको र त्यसपछि परिवारका सदस्यहरू घरबाट बाहिर सडकमा भागेको उनले सम्झिए ।
संयुक्त राष्ट्रसंघीय मानवीय मामिला समन्वय कार्यालयका अनुसार करिब ५ हजार घरमा क्षति पुगेको छ भने दर्जनौं आवासीय भवन पूर्ण रूपमा भत्किएका छन् । कोलम्बियाको तेस्रो ठूलो सहर कालीमा मात्रै स्थानीय सरकारी तथ्यांकअनुसार कम्तीमा ९५ जनाको मृत्यु भएको छ भने ४५ वटा संरचना पूर्ण वा आंशिक रूपमा भत्किएका छन् ।
भ्यान्सा भवनमा उद्धार कार्य भइरहेको हेर्दै स्थानीय बासिन्दा मारिया इसाबेल कुम्बाल रोइरहेकी थिइन् । उनले भनिन्, ‘मैले आफ्नो सहरलाई यस्तो अवस्थामा देख्नुपर्ला भनेर कहिल्यै सोचेकी थिइनँ ।’ साततले आवासीय भवन सोमबारको भूकम्पमा पूर्ण रूपमा भग्नावशेषमा परिणत भएको थियो ।
उद्धारकर्ताहरूले अहिले हथौडा, बेल्चा तथा ठूला मेसिन प्रयोग गर्दै बाक्ला कंक्रिटका संरचना हटाएर भग्नावशेषमुनि फसेका अनुमानित २० जनालाई जीवितै उद्धार गर्ने प्रयास गरिरहेका छन् ।
भत्किएको भवन वरपर सयौँ स्वयंसेवकले पनि उद्धार कार्यमा सहयोग गरिरहेका छन् । उनीहरूले मानव शृंखला बनाएर भग्नावशेषबाट बाल्टिनमा माटो तथा अन्य सामग्री निकालेर डम्प ट्रकसम्म पुर्याइरहेका छन् । समय–समयमा उद्धारकर्तामध्ये कसैले मुट्ठी उठाएर शान्त रहन संकेत गर्छन्, ताकि आपतकालीन उद्धारकर्मीहरूले भग्नावशेषभित्रबाट जीवनको कुनै संकेत वा आवाज सुन्न सकून् । भवन भत्किँदा त्यसको संरचना छेउको अर्को भवनमाथि खसेको थियो । त्यहाँ एउटा बालबालिकाको नर्सरी समेत रहेको स्वयंसेवकहरूले बताएका छन् ।
