— अमेरिकी राष्ट्रपति डोनाल्ड ट्रम्पले गत महिना टर्कीएमा भएको नाटो शिखर सम्मेलनबाट फर्किने क्रममा सम्भावित इरानी क्षेप्यास्त्र आक्रमणको खतराका कारण आफूले गोप्य रूपमा विमान फेरेको पुष्टि गरेका छन्।
मंगलबार सञ्चारकर्मीसँग कुरा गर्दै ट्रम्पले आफ्नो सुरक्षा टोली र सेनाको सुझावअनुसार आफू अर्को विमानमा सरेको बताए। ‘उनीहरूले मलाई अर्को उडान, अर्को विमानमा जान भनेका थिए। मैले उनीहरूले भनेअनुसार गर्नुपर्छ,’ उनले भने।
ट्रम्प जुलाई ८ मा टर्कीको अंकाराबाट पुरानो एयर फोर्स वनमा फर्किने तयारीमा थिए। टेलिभिजन क्यामेराले उनलाई उक्त विमानमा चढेको दृश्यसमेत खिचेका थिए। तर, त्यसपछि उनी विमानको अर्को पट्टिबाट क्याटरिङ ट्रकमार्फत निकालिएर गोप्य रूपमा सानो सैन्य विमान सी–३२एमा सारिएको विवरण सार्वजनिक भएको छ।
अमेरिकी अधिकारीहरूले सीबीएस न्युजलाई दिएको जानकारीअनुसार अमेरिकी सुरक्षा निकायले इरानबाट विमानमा क्षेप्यास्त्र प्रहार हुन सक्ने विश्वसनीय खतरा पत्ता लगाएको थियो। द न्युयोर्क टाइम्सले नाटो सम्मेलनस्थलनजिक काँधबाट प्रहार गर्न मिल्ने क्षेप्यास्त्र बोकेको व्यक्ति देखिएकोसम्बन्धी सूचना अमेरिकी गुप्तचर निकायसँग रहेको जनाएको छ।
ट्रम्पले भने आफूले खतराबारे धेरै जानकारी नलिएको बताएका छन्। ‘मलाई धेरै धम्की आउँछन्,’ उनले भने, ‘तपाईंहरूलाई थाहा नभएका धेरै धम्की पनि छन्।’
विमान परिवर्तनको यो योजनाबारे एयर फोर्स वनमा रहेका अधिकांश पत्रकार र ह्वाइट हाउसका कर्मचारीसमेत अनभिज्ञ थिए। उनीहरूलाई विमानका झ्यालका पर्दा बन्द राख्न भनिएको थियो। राष्ट्रपति विमानमा नरहेको थाहा नपाई उनीहरू एयर फोर्स वनमै फर्किएका थिए।
ह्वाइट हाउस करेस्पोन्डेन्ट्स एसोसिएसनका अनुसार विमानमा रहेका पत्रकारहरूले झ्यालका पर्दा बन्द राख्न दिइएको निर्देशन असामान्य लागेको बताएका छन्। विमानको अगाडि र पछाडि दुईवटा क्याटरिङ ट्रक राखिएको देखिएको र पत्रकारहरूलाई राष्ट्रपति चढेको तस्बिर लिनबाट समेत अप्रत्यक्ष रूपमा रोकिएको विवरण सार्वजनिक भएको छ।
ट्रम्पलाई सारिएको सी–३२ए सैन्य विमान बोइङ ७५७ को परिमार्जित संस्करण हो, जुन उपराष्ट्रपतिसहित उच्चपदस्थ अधिकारीको यात्रामा प्रयोग हुने गर्छ। अमेरिकी रक्षा सचिव पिट हेगसेथ पनि छुट्टै रूपमा सोही विमानमा चढेका थिए।
ट्रम्पले विमान परिवर्तन भएको पुष्टि गरे पनि कुन प्रकारको खतरा थियो भन्नेबारे विस्तृत जानकारी दिएका छैनन्। यस घटनाले इरानसँगको द्वन्द्वका क्रममा अमेरिकी राष्ट्रपतिको सुरक्षालाई लिएर कायम चिन्तालाई भने थप उजागर गरेको छ।
अमेरिकी अधिकारीहरूले युद्ध वा द्वन्द्वग्रस्त क्षेत्रमा राष्ट्रपतिको यात्रा गर्दा यस्ता सुरक्षा उपाय असामान्य नभएको बताएका छन्। यसअघि पनि अमेरिकी राष्ट्रपतिहरू अफगानिस्तान, इराक र युक्रेनजस्ता संवेदनशील क्षेत्रमा गोप्य रूपमा यात्रा गरेका छन्। तर, सञ्चारमाध्यमलाई जानकारी नै नदिई राष्ट्रपतिलाई आधिकारिक विमानबाट अलग गरेर ‘डिक्वे’ विमान प्रयोग गराइएको घटना भने असामान्य मानिएको छ।
इरानसँगको द्वन्द्वका क्रममा ट्रम्पले आफू इरानको ‘मुख्य लक्ष्य’ रहेको बताउँदै आएका छन्। यसअघि अमेरिकी अधिकारीहरूले पनि इरानले ट्रम्पलाई लक्षित गर्न सक्ने खतरा रहेको दाबी गरेका थिए। पछिल्लो विमान परिवर्तनको घटनाले युद्ध अन्त्यतर्फ गएको ट्रम्पको दाबीका बाबजुद इरानबाट अमेरिकी राष्ट्रपतिमाथि रहेको सुरक्षा जोखिम अझै कायम रहेको संकेत गरेको छ।
