: नेपाली कांग्रेसका नेता डा. शेखर कोइरालाले विराटनगर महानगरपालिका–७ स्थित कोइराला निवास मर्मत–संरक्षणका लागि विनियोजित बजेट अस्वीकार गरेका छन् ।
संस्कृति, पर्यटन तथा नागरिक उड्डयन मन्त्रालयलाई पठाएको पत्रमा कोइरालाले आर्थिक वर्ष २०८३ /०८४ को बजेटमा कोइराला निवास मर्मत तथा संरक्षणका लागि विनियोजन गरिएको दुई करोड रुपैयाँप्रति सरकारलाई धन्यवाद दिँदै उक्त रकम फिर्ता गर्न आग्रह गरेका छन् । उनले साउन २० गते संस्कृति, पर्यटन तथा नागरिक उड्डयन मन्त्रालयका सचिवलाई सम्बोधन गर्दै बजेट अस्वीर गरिएको पत्र पठाएका हुन् ।
कोइरालाले आफूले राज्य स्रोतको सीमित साधन उपयोग गर्दा आम नागरिकको आवश्यकता र प्राथमिकतालाई ध्यान दिनुपर्ने मान्यता राख्ने बताएका छन्। देशमा धेरै नागरिक अभाव र कठिनाइमा रहेका बेला आफ्नो पारिवारिक सम्पत्ति मर्मतका लागि राज्यको बजेट प्रयोग गर्नु नैतिक रूपमा स्वीकार्य नहुने उनले स्पष्ट पारेका छन् ।
विराटनगर–७ स्थित उनका पिता कृष्णप्रसाद कोइरालाले शताब्दीअघि निर्माण गरेको घर, ‘कोइराला निवास’ का रूपमा परिचित छ । गत वर्षको भदौ २४ गतेको जेनजी आन्दोलनका क्रममा उक्त ऐतिहासिक घरमा आगजनी भई भौतिक संरचनामा क्षति पुगेको पनि पत्रमा जनाइएको छ । डा. कोइरालाले आफ्ना पिता कृष्णप्रसाद कोइरालाले शैक्षिक जागरणमार्फत समाज रूपान्तरणको अभियान सुरु गरेको स्मरण गर्दै कोइराला निवास केवल पारिवारिक घर नभई नेपाली समाजको राजनीतिक तथा सामाजिक चेतनासँग जोडिएको ऐतिहासिकस्थल भएको बताएका छन् ।
