: उत्तरी गोरखाको धार्चे–२ दोभान र धार्चे १ हुल्चुक जोड्ने गरी बूढीगण्डकीमाथि बेलिब्रिज निर्माण कार्य सम्पन्न भएको छ। दोभान खोला जलविद्युत् आयोजनाले उक्त बेलीबिज्र निर्माण गरेको धार्चे–१ हुल्चुकका वडाअध्यक्ष रामसिंह गुरुङले जानकारी दिए।
बुढीगण्डकी नदीमाथि करिब ४२ मिटर लामो बेलिब्रिज निर्माण कार्य सम्पन्न भएको उनले जानकारी दिए। गुरुङका अनुसार दोभान खोला हाइड्रोपावर आयोजनाले आफ्नो परियोजनाको काम सञ्चालन गर्नका लागि र स्थानीयवासीलाई समेत आवतजावतमा सजिलो होस् भन्ने उद्देश्यले उक्त पुल निर्माण गरिएको वडाअध्यक्ष गुरुङले जानकारी दिए।
बेलिब्रिज निर्माण भएपछि बेनिघाट–लार्के सडकबाट हुल्चुकसम्म सवारी साधन सहजै पुग्न सक्ने हुँदा स्थानीयवासीलाई ठूलो राहत पुग्ने विश्वास गुरुङले व्यक्त गरे। जलविद्युत् आयोजनाले सामाजिक उत्तरदायित्वको कार्यक्रमअन्तर्गत पुल निर्माण गरेको हो। ‘पुल हामी हुल्चुकबासीको आवश्यकता हो’, गुरुङले भने, ‘हाइड्रोपावरको काम पनि पुल निर्माण नगरी अघि नबढ्ने रहेछ। पुल बनेपछि आयोजनाको काम पनि अघि बढ्ने भयो। हामी हुल्चुकबासी पनि लाभान्वित हुने भयौं।’
धार्चेको सबै वडामा मोटरबाटो पुगे पनि पुल नहुँदा धार्चे गाउँपालिका–१ हुल्चुकमा अहिलेसम्म सडक सञ्जालले जोड्न सकेको थिएन। पुल बनेर यहाँ पनि मोटर चल्न थालेपछि धार्चे गाउँपालिकाको सबै वडाहरूमा यातायातको सुबिधा पुग्ने वडाअध्यक्ष गुरुङको भनाइ छ।
हुल्चुकमा यातायातको सुबिधा नहुँदा महँगोमा खाद्यन्न सामाग्री ढुवानी गर्नुपर्ने बाध्यक्ष रहेको थियो। ‘धार्चे–३ दोभानसम्म बजारकै भाउमा सामान आउँछ। तर, दोभानपारि हुल्चुकमा मोटर नआउँदा खाद्यान्न सामाग्री प्रतिकेजी ५ रुपैयाँको दरले भाडा तिरेर खच्चडमा ढुवानी गर्नुपर्ने बाध्यता थियो’, वडाअध्यक्ष रामसिंह गुरुङले भने। बेलिबिज्र निर्माण भएपछि हुल्चुकवासीले बजारको मूल्यमा नै खाद्यान्न खरिद बिक्री गर्न पाउने उनले बताएका छन्। करिब ५ करोड रुपैयाँ लागतमा बेलीिब्रज निर्माण भएको हो। सो पुल निर्माणको काम गत फागुनबाट सुरु भएको थियो।
