। अर्थमन्त्री डा. स्वर्णिम वाग्लेले २३ र २४ भदौ २०८२ को आन्दोलनका दौरान सरकारी कागजात जलेर लेखा परीक्षण हुन नसकेको सन्दर्भमा सार्वजनिक लेखा समितिको मार्गनिर्देशन पालना गर्ने बताएका छन् ।
समितिको आजको बैठकमा सांसदहरूले उठाएका प्रश्नको जवाफ दिँदै अर्थमन्त्री वाग्लेले यसघटनाबारे सरकार र प्रतिपक्षीको दृष्टिकोणमा खासै फरक नरहेको बताए ।
त्यसअघि पूर्वअर्थमन्त्री वर्षमान पुनले यो सन्दर्भमा सरकारको दृष्टिकोण आउनुपर्ने बताएका थिए । ‘समस्याबारे समान बुझाई भएपछि समाधानमा पनि समान अप्रोच हुन्छ, सरकारको यसमा असहमति छैन, हामी समितिको मार्गनिर्देशन मान्छौं’ उनले भने ।
२३ र २४ को घटनालाई काबु बाहिरको घटना भन्दा समान दृष्टिकोण हुने उनले बताए । कागजात उत्खनन्, रुजु गर्ने र सेकेन्डरी डाटाबाट पुनर्स्थापित गर्ने कुरा नै वैज्ञानिक पाटो हुने उनले बताए ।
अनियमितता नहोस् भन्नका लागि भने समितिबाट अनुगमन हुन सक्ने उनले बताए । भविष्यमा यस्ता घटना हुन नदिन, डिजिटलाइज र डिजिटाइज गर्ने काम निरन्तर हुने उनले बताए ।
