। इंग्लिस क्लब लिभरपुलले बार्सिलोनाका उरुग्वेली डिफेन्डर रोनाल्ड अराउहोलाई एक सिजनका लागि लोनमा अनुबन्ध गरेको छ ।
२७ वर्षीय अराउहोलाई लिभरपुलले सिजनभरका लागि ल्याएको हो। सम्झौतामा स्थायी रूपमा अनुबन्ध गर्न सक्ने विकल्पसमेत राखिएको छ ।
बार्सिलोनाबाट २०० भन्दा बढी खेल खेलिसकेका अराउहोले क्लबका लागि तीन ला लिगा र दुई कोपा डेल रे उपाधि जितेका छन् । उनी सेन्टर ब्याकसँगै राइट ब्याकको भूमिकामा पनि खेल्न सक्छन् ।
लिभरपुलले फ्रान्सेली डिफेन्डर इब्राहिमा कोनाटेले रियल मड्रिडमा फ्री ट्रान्सफरमा क्लब छाडेपछि रक्षापंक्ति बलियो बनाउन अराउहोलाई भित्र्याएको हो ।
‘यति ठूलो इतिहास भएको क्लबमा आउन पाउँदा निकै उत्साहित छु। सहकर्मीलाई भेट्न र खेल सुरु गर्न आतुर छु। यो मेरो करियरको यो चरणमा आवश्यक र सही कदम थियो,’ अराउहोले भनेका छन् ।
अराउहोले बार्सिलोनाका लागि २०० भन्दा बढी खेल खेले पनि गत सिजन ला लिगामा ११ खेलमा मात्रै सुरुवाती टोलीमा परेका थिए । प्रशिक्षक हान्सी फ्लिकको नेतृत्वमा गेरार्ड मार्टिन र पाउ कुबार्सीले सेन्टर डिफेन्समा बढी अवसर पाएपछि उनको खेल्ने समय सीमित बनेको थियो ।
यसअघि चोट र व्यक्तिगत समस्याका कारण पनि अराउखो केही समय मैदानबाट टाढा रहेका थिए । उनले गत डिसेम्बरमा क्लबबाट केही समय बिदा लिएर परिवारसँग उरुग्वेमा समय बिताएका थिए ।
उरुग्वेका लागि सन् २०२० मा डेब्यू गरेका अराउखोले हालसम्म २७ अन्तर्राष्ट्रिय खेल खेलेका छन् । उनी यसै वर्षको विश्वकपका लागि उरुग्वेको टोलीमा रहे पनि प्रतियोगितामा मैदान उत्रन पाएनन् ।
लिभरपुलले नयाँ सिजनको पहिलो प्रिमियर लिग खेल अगस्ट २३ मा न्युक्यासल युनाइटेडसँग उसैको मैदानमा खेल्दैछ ।
