। बजारमा एलपी ग्यासको अभाव भएको भन्ने जनगुनासो बढेपछि तेह्रथुममा ग्याँस डिलरहरूको अनुगमन गरिएको छ ।
जिल्ला प्रशासन कार्यालय, जिल्ला प्रहरी कार्यालय, सशस्त्र प्रहरी बल नेपाल नं. ३ गुल्म हेडक्वार्टर जिरीखिम्ती र नेपाल पत्रकार महासंघ तेह्रथुमको संयुक्त टोलीले म्याङलुङ बजारमा रहेका ग्यास डिलरहरूको अनुगमन तथा निरीक्षण गरेको हो ।
अनुगमनका क्रममा डिलरहरूमा रहेको ग्यासको मौज्दात, बिक्री-वितरणको अवस्था तथा उपभोक्ताले ग्यास पाउन भइरहेको सहजता र असहजताबारे जानकारी लिइएको थियो ।
अनुगमनमा प्रीमा ग्यास डिलरमा करिब ६० सिलिन्डर, रिजाल ग्यास डिलरमा करिब २२ सिलिन्डर र कोशी ग्यास डिलरमा २ वटा सिलिन्डर मौज्दात रहेको पाइएको छ ।
अनुगमनका क्रममा तत्काल कुनै किसिमको कैफियत वा अनियमितता फेला नपरेको र उपभोक्ताले ग्यास प्राप्त गर्न ठूलो हैरानी व्यहोर्नुपरेको अवस्था पनि नदेखिएको जिल्ला प्रशासन कार्यालयले जनाएको छ ।
बजारमा ग्याँस नपाइने भन्ने हल्लाका कारण उपभोक्ता आत्तिने र आवश्यकताभन्दा बढी ग्यास मौज्दात राख्ने प्रवृत्तिले केही डिलरमा ग्यासको मौज्दात कम देखिएको पाइएको हो ।
एपी ग्याँस डिलरका बिक्रेता राजेन्द्र कार्कीका अनुसार बजारमा ग्यास अभाव हुने हल्लाका कारण उपभोक्ताले आवश्यकताभन्दा बढी सिलिन्डर राख्न खोज्दा माग बढेको छ । तर, डिलरले उपभोक्ताको आवश्यकताका आधारमा ग्याँस वितरण गर्दै आएको उनको भनाइ छ । यता, अनुगमन टोलीले ग्याँस डिलर सञ्चालकहरूलाई प्रचलित मापदण्ड तथा कानुनी व्यवस्थाअनुसार पारदर्शी र व्यवस्थित रूपमा ग्यास बिक्री-वितरण गर्न निर्देशन दिएको छ ।
सहायक प्रमुख जिल्ला अधिकारी वालकृष्ण लिम्बुले बजारमा ग्यासको वास्तविक अवस्था बुझ्न अनुगमन गरिएको बताउँदै तत्काल ग्यास अभाव वा अनियमितताको अवस्था नरहेको जानकारी दिए । यससँगै प्रशासनले उपभोक्तालाई पनि बजारमा ग्यास अभाव भएको भन्ने हल्लाकै भरमा आवश्यकताभन्दा बढी ग्यास मौज्दात नराख्न आग्रह गरेको छ । ग्यासको आपूर्ति र बिक्री-वितरणलाई सहज बनाउन सम्बन्धित निकायले समेत निरन्तर निगरानी गर्ने जनाएको छ ।
