: अमेरिकाका पूर्व राष्ट्रपति जो बाइडेनको प्रोस्टेट क्यान्सर हड्डीभन्दा बाहिरसम्म फैलिएको र उनी निकै पीडामा रहेको उनका छोरा हन्टर बाइडेनले बताएका छन् । हन्टर बाइडेनले बीबीसीको ‘न्युज नाइट’ कार्यक्रममा दिएको अन्तर्वार्तामा भने, ‘क्यान्सर उहाँको हड्डी र त्यसभन्दा बाहिरसम्म फैलिएको छ । यो निकै पीडादायी छ र धेरै हिसाबले कमजोर बनाउने अवस्था हो ।’
जो बाइडेनले सन् २०२५ को मे महिनामा, ह्वाइट हाउस छाडेको करिब चार महिनापछि आफूलाई प्रोस्टेट क्यान्सर भएको सार्वजनिक गरेका थिए । त्यतिबेला उनले क्यान्सर हड्डीसम्म फैलिसकेको बताएका थिए । बाइडेनले सन् २०२० मा अमेरिकी राष्ट्रपतिको निर्वाचन जितेका थिए र सन् २०२१ देखि २०२५ सम्म राष्ट्रपति पदमा रहेका थिए । उनको स्वास्थ्यलाई लिएर राष्ट्रपतित्वकालमै विभिन्न प्रश्न उठ्ने गरेका थिए । जो बाइडेन अहिले ८३ वर्षका छन् ।
अन्तर्वार्ताका क्रममा हन्टर बाइडेन आफ्ना बुबाको स्वास्थ्यबारे कुरा गर्दा पटक–पटक भावुक भएका थिए । उनले भने, ‘आज पनि मेरा बुबा हाम्रो परिवारको केन्द्रमा हुनुहुन्छ । उहाँ सबैभन्दा राम्रो बुबा, सबैभन्दा राम्रो श्रीमान् र सबैभन्दा राम्रो हजुरबुबा हुनुहुन्छ ।’
हन्टर बाइडेनले सन् २०२४ को जुन महिनामा भएको त्यो राष्ट्रपतीय बहसका बारेमा पनि कुरा गरे, जसपछि उनका बुबाको दोस्रो कार्यकालका लागि चुनाव लड्ने अभियान अन्ततः समाप्त भएको थियो । उनले क्यालिफोर्नियास्थित आफ्नो घरबाट उक्त बहस हेरेको र तत्कालै केही गडबड भएको महसुस गरेको बताए । उनले भने, ‘म स्तब्ध भएँ । मलाई थाहा भयो कि केही गडबड छ ।’
