: ब्राजिलको रियो दि जेनेरियोमा हेलिकप्टर दुर्घटना हुँदा कम्तीमा चार जनाको मृत्यु भएको छ । शनिबार भएको दुर्घटनामा हेलिकप्टरका पाइलटसहित तीन जना कोलम्बियाली महिलाको मृत्यु भएको कोलम्बियाली महावाणिज्यदूतले जनाएको छ । ती तीन महिला एउटै परिवारका सदस्य रहेको बताइएको छ ।
उनीहरू सहरको छेउमा रहेको बाक्लो जंगल र पहाडी क्षेत्र तिजुका राष्ट्रिय निकुञ्जमाथि पर्यटकीय भ्रमणका लागि हेलिकप्टरमा सवार थिए । दुर्घटनापछि रियो दि जेनेरियोका मेयर एडुआर्डो काभालिएरीले पर्यटकीय हेलिकप्टर उडानको निगरानी थप कडा बनाउनु पर्ने बताएका छन् । नयाँ सुरक्षा उपाय लागू गर्ने क्रममा यस्ता उडान ‘एक–दुई हप्ताका लागि’ स्थगित गर्न सकिने समेत उनले बताएका छन् ।
काभालिएरीले सामाजिक सञ्जालमा लेखेका छन्, ‘तिजुका राष्ट्रिय निकुञ्जभित्र भिस्टा चिनेजा नजिकै आज भएको हेलिकप्टर दुर्घटनामा ज्यान गुमाएका व्यक्तिका परिवारप्रति मेरो गहिरो समवेदना छ ।’ उनले ब्राजिलको राष्ट्रिय नागरिक उड्डयन एजेन्सीसँग आफूले सम्पर्क गरिरहेको पनि बताए । दुर्घटना भिस्टा चिनेजा नजिक भएको थियो । यो स्थान एउटा सानो बाँसको प्यागोडाले सजिएको प्रसिद्ध दृश्यावलोकन स्थल हो ।
तिजुका राष्ट्रिय निकुञ्ज रियो दि जेनेरियोको प्रमुख पर्यटकीय गन्तव्यमध्ये एक हो । यहाँबाट क्राइस्ट द रिडिमरको प्रतिमा र समुद्री किनारसहित सहरको मनोरम दृश्य देखिन्छ । कोलम्बियाली महावाणिज्यदूतका अनुसार हेलिकप्टरमा सवार तीनै महिला एउटै परिवारका थिए । उनीहरू एक बालिकाको १५ औं जन्मदिन मनाउन रियो आएका थिए ।
छ जनाको उक्त समूह हेलिकप्टरमा एक पटकमा तीन जना मात्रै अट्ने भएकाले दुई समूहमा विभाजित भएको थियो । दुर्घटनामा बालिकाकी हजुरआमा, काकी र भतिजीको मृत्यु भएको हो । रियो दि जेनेरियोका विभिन्न पर्यटकीय स्थललाई आकाशबाट हेर्न हेलिकप्टर सवारी लोकप्रिय बन्दै गएको छ । तर यसको सुरक्षालाई लिएर पछिल्लो समय चिन्ता पनि बढ्दै गएको छ । यसअघि जुन १४ मा रियोको पश्चिमी क्षेत्रमा पर्ने रेक्रीयो दोस बान्देइरान्तेसमाथि दुई हेलिकप्टर आकाशमै ठोक्किँदा छ जनाको मृत्यु भएको थियो ।
