: प्रतिनिधिसभाका सांसद पारसमणि गेलालले मल र ग्यासका लागि नागरिकहरु लाइनमा बसिरहेको भिडियो आइरहेको बताउँदै यसबारे सम्बन्धित मन्त्रालयले स्पष्ट बताइ दिनु पर्ने बताएका छन् ।
प्रतिनिधिसभाको शुक्रबारको बैठकमा बोल्दै सांसद गेलालले बेलका, त्रिुयुगा र चौदन्डीगढी नगरपालिकामा मल लिनका लागि हजारौं नागरिकहरु लाइनमा बसेको विभिन्न सञ्चारमाध्यमहरुबाट आफूलाई ट्याग गरेर भिडियोहरु आइरहेको पनि उनले बताए । सांसद गेलालले यस विषयमा सम्बन्धित मन्त्रालयको ध्यानाकर्षण गराउँदै भने, ‘साँच्चै मल छैन भने मन्त्रालयले छैन भनिदिनु पर्यो ।’ मन्त्रालयले मल पर्याप्त छ भनिरहेको अवस्थामा त्यो मल आफूहरुले सम्बन्धित नगरपालिकाका मेयरहरुसँग समन्वय गरेर त्यहाँसम्म पुर्याउन तयार रहेको बताए ।
उनले भने, ‘हामी सांसदहरुलाई त्यसको भूमिका दिनु पर्यो ।’ ग्यासको पनि हाहाकार रहेको र गाउँ गाउँमा नपाइएको बताउँदै उनले ग्यासको वास्तविक अवस्था के हो त्यो पनि जानकारी गराउन सरकारलाई माग गरे । उनले भने, ‘छैन भने आवश्यक मात्रामा ग्यास छैन, वैकल्पिक रुपमा त्यसको प्रवन्ध गरौं भनेर हामी नागरिकहरुलाई आहवान गर्छौ यदि छ भने त्यो ग्यास कहाँ छ भनि दिनु पर्यो ।’
