: काभा महिला भलिबल च्याम्पियनसिपको आगामी संस्करण पुनः नेपालमा नै आयोजना हुने भएको छ । नेपाल भलिबल संघको १४ औं पूर्ण बैठकले काभा महिला भलिबल च्याम्पियनसिप आगामी कात्तिक १५ देखि २१ सम्म (नोभेम्बर १ देखि७ ) सम्म काठमाडौंमा हुने भएको छ ।
नेपाल भलिबल संघको १४ औं पूर्ण बैठकमा यससँगै अन्य विषयहरुको पनि उठान र निर्णय भएको थियो । जसमा भलिबल संघको स्थापना भएको ५० वर्ष पुग्न लाग्दा आगामी अक्टोबरमा भलिबल संघको ‘गोल्डेन जुब्ली’ (स्वर्ण जयन्ती) मनाउने भएको छ ।
यसै बैठकले आगामी असोजमा संघको जिल्ला तथा प्रदेशको चुनावी साधारण सभा गराउने निर्णय गरेको हो । असोजको ६ गतेसम्म ७७ जिल्लाको र असोज १५ गतेसम्म ७ प्रदेशको चुनाव सम्पन्न गर्ने निर्णय भएको भलिबल संघका महासचिव रोशन श्रेष्ठले अन्नपूर्ण पोष्टसँग कुरा गर्दै जानकारी दिएका हुन् ।
त्यस्तै, भलिबल नेपालको राष्ट्रिय खेल घोषणा भएको दशक पुग्न लाग्दा समेत अन्तर्राष्ट्रियस्तरको कभर्ड हल नभएको हुँदा यो बैठकले पूर्वाधारमा पनि जोड दिने निर्णय गरेको श्रेष्ठले जानकारी दिए । ‘नेपालको राष्ट्रिय खेल भलिबल घोषणा भएको १० वर्ष पुग्न लाग्दा पनि राम्रो कभर्ड हल नहुँदा अब कर्पोरेट तथा नेपालका आम भलिबल समर्थकको साथमा हामी पूर्वाधार विकास गर्न चाहन्छौं’, उनले अन्नपूर्ण पोष्टसँग भने ।
अन्तर्राष्ट्रिय प्रतियोगिता आयोजनाको लागि काठमाडौंमा ५ हजार दर्शक क्षमताको कभर्ड हल तथा सातै प्रदेशमा ३ हजार दर्शक क्षमताको कभर्ड हल बनाउने लक्ष्य राखेको महासचिव श्रेष्ठले भने । ‘यसको लागि सम्पूर्ण नेपालीको सहयोगको आवश्यक पर्नेछ । हामी सबै तर्फको सहयोगको अपेक्षा राख्दछौं ।’
