— वीरगन्जमा दुई युवाबीच भएको कुटपिट घटनामा संलग्न एक जनालाई प्रहरीले पक्राउ गरी अनुसन्धान अघि बढाएको छ।
घटनालाई लिएर सामाजिक सञ्जाल र केही सञ्चारमाध्यममा धार्मिक सद्भाव खल्बल्याउने प्रकृतिका सामग्री प्रसारण भएको भन्दै पर्सा प्रहरीले सही तथ्यका आधारमा मात्र समाचार सम्प्रेषण गर्न आग्रह गरेको छ।
जिल्ला प्रहरी कार्यालय पर्साका अनुसार शुक्रबार साँझ करिब साढे ७ बजे वीरगन्ज महानगरपालिका–२ स्थित ईदगाहा चोकको भित्री सडकमा विगतको व्यक्तिगत विवादका कारण वीरगन्ज–१६ इनर्वागाउँका १८ वर्षीय रन्जित यादवमाथि वीरगन्ज–२ का १८ वर्षीय समिर अन्सारीले कुटपिट गरेका थिए।
कुटपिटबाट यादवको ओठ र नाकमा चोट लागेको प्रहरीले जनाएको छ। घाइतेलाई तत्काल प्रभु अस्पताल पुर्याई उपचार भइरहेको छ।
घटनामा संलग्न समिर अन्सारीलाई प्रहरीले नियन्त्रणमा लिएर थप अनुसन्धान गरिरहेको प्रहरी प्रवक्ता तथा सूचना अधिकारी डीएसपी चक्रबहादुर मल्लले जानकारी दिए।
प्रहरीले घटनाको अनुसन्धान जारी रहेका बेला सामाजिक सञ्जाल तथा केही सञ्चारमाध्यममा धार्मिक सद्भाव बिथोल्ने ढंगले समाचार र सामग्री प्रसारण भएकोप्रति गम्भीर ध्यानाकर्षण भएको जनाएको छ। घटनाको सत्यतथ्यका आधारमा कानुनी प्रक्रिया अघि बढिसकेको उल्लेख गर्दै प्रहरीले धार्मिक सद्भाव कायम राख्ने गरी सही र तथ्यपरक सूचना मात्रै सम्प्रेषण गर्न सञ्चारमाध्यम र सर्वसाधारणसँग अपिल गरेको छ।
