— इरानको ड्रोन आक्रमणमा परी कुवेतमा ज्यान गुमाएका तेह्रथुमका सोमकुमार तामाङको शव शनिबार आउने भएको छ । परराष्ट्र मन्त्रालयका अनुसार कुवेत एयरवेजमार्फत शव नेपाल ल्याउन लागिएको हो ।
कुवेतस्थित नेपाली राजदूतावासले स्थानीय निकाय तथा सम्बन्धित कम्पनीसँग आवश्यक समन्वय गरी शव स्वदेश पठाउने प्रक्रिया सम्पन्न गरेको परराष्ट्रले जनाएको छ ।
कुवेतस्थित नेपाली दूतावासका अनुसार कुवेतको उत्तरी क्षेत्रस्थित फुफेन आइल्यान्डस्थित चाइनिज कम्पनीको भवनमा आक्रमण हुँदा गत १४ साउनमा ४४ वर्षीय तामाङको मृत्यु भएको थियो । उनी सन् २०२२ देखि कुवेतमा सवारी चालकको काम गर्दै आएका थिए ।
इरान र अमेरिका–इजरायलबीच जारी युद्धबाट पश्चिम एसियामा मृत्यु हुने नेपाली श्रमिकको संख्या दुई पुगेको छ । यसअघि यूएईमा गोरखाका दिवस श्रेष्ठको मृत्यु भएको थियो ।
कुवेत सरकारले एक साताअघि जारी गरेको विवरणअनुसार त्यहाँ एक लाख ८६ हजार नेपाली कार्यरत छन् । जसमा कम्पनीमा एक लाख १५ हजार, घरेलु श्रमिकमा ६८ हजार ९ सय र सरकारी क्षेत्रमा चार सय २१ जना काम गरिरहेका छन् । यो कुवेतमा रहेको कुल जनसंख्याको ४ प्रतिशत हो ।
