: मोरङको बुढीगंगा गाउँपालिका–४ स्थित अगुर दाना मिलअगाडि घाइते अवस्थामा भेटिएका एक युवकको मृत्यु सामान्य रूपमा लडेर नभई ट्रकले किचेर भएको तथ्य पोस्टमार्टमपछि खुलेको छ । घटनाको वास्तविकता सार्वजनिक भएपछि प्रहरीले ट्रक चालकलाई पक्राउ गरेर थप अनुसन्धान अघि बढाएको छ ।
सुनसरीको गढी गाउँपालिका–२ घर भई हाल बुढीगंगा गाउँपालिका–५ दीपु टोलस्थित ससुरालीमा बस्दै आएका ३५ वर्षीय सुरज ऋषिदेव साउन १० गते आइतबार साँझ करिब ६:३० बजे सडकमा घाइते अवस्थामा फेला परेका थिए । उनको उद्धार गरी उनलाई उपचारका लागि विराट शिक्षण अस्पताल पुर्याएको थियो । तर, अस्पताल पुगेलगत्तै चिकित्सकले उनलाई मृत घोषणा गरेका थिए ।
त्यसपछि शव पोस्टमार्टमका लागि विराटनगरस्थित कोशी अस्पताल पठाइएको थियो । प्रारम्भिक रूपमा लडेर मृत्यु भएको अनुमान गरिए पनि पोस्टमार्टम रिपोर्टले त्यसलाई पुष्टि गरेन । रिपोर्टमा अन्य कारणबाट मृत्यु भएको देखिएपछि प्रहरीले घटनाको नयाँ कोणबाट अनुसन्धान सुरु गरेको थियो ।
अनुसन्धानका क्रममा मृतक रोकेर राखिएको ना ७ ख ७८८ नम्बरको ट्रकमुनि गएर सुतेको र चालकले त्यसका बारेमा जानकारी नपाई ट्रक अगाडि बढाउँदा चक्काले किचेर उनको मृत्यु भएको खुलेको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए । उनका अनुसार घटनामा संलग्न ट्रक र चालक झापाको कचनकवल गाउँपालिका–१ निवासी ३० वर्षीय हरि थापालाई मंगलबार दिउँसो नियन्त्रणमा लिइएको छ ।
चालकको लापरबाहीका कारण दुर्घटना भएको देखिएको मिश्रले बताए । पोस्टमार्टम रिपोर्टपछि घटनाको वास्तविकता खुलेसँगै ट्रक र चालकलाई नियन्त्रणमा लिएर घटनाको थप अनुसन्धान अघि बढाइएको जानकारी उनले दिए ।
