: सर्लाही सदरमुकाम मलङ्गवा नगरपालिका-९ स्थित नेपाल टेलिकमको टावरमाथि चढेका युवक तल ओर्लिएका छन्। ८० मिटर उचाइ रहेको टावरमाथि गोडैता नगरपालिका- ९ बकैनियाका २४ वर्षीय अफसर आलम हुसैन चढेका थिए।
रातीको समयमा उनी टावरमाथि चढेका थिए। टावरमाथी चढेर साथीलाई फोन गरेपछि घटना बाहिएरको थियो। सुरक्षाकर्मी, परिवारजन र नेपाल टेलिकमको कर्मचारीहरुले प्रयास गर्दा उनी सुरुमा झर्न मानेनन्, पछि तलबाट बुबाले फोन गरेर सम्झाउँदा हुसैन टावरबाट ओर्लिएका हुन्।
सुरुमा तल आएका हुसैन र उनका दुई साथीलाई समेत प्रहरीले नियन्त्रणमा लिएका थिए। अहिले प्रहरीले उनका साथीलाई छाडेका छन् भने हुसैनलाई अस्पतालमा काउन्सेलिङ्ग र स्वास्थ्य परीक्षण पश्चात् परिवारको जिम्मा लगाइएको छ। स्रोतका अनुसार गाउँकै केटीसँग बिहे गर्न चाहेपनि नमिलेपछि उनले यस्तो गतिविधि गरेको बताइएको छ। प्रहरीले घटनाको अनुसन्धान गरिरहेको जनाएको छ।
