: पाकिस्तानको एउटा मालवाहक (कार्गो) विमान मंगलबार राति रहस्यमय रुपमा सम्पर्कविहीन भएको छ । विमानमा चालक दलका पाँच सदस्य सवार थिए । यो विमान शारजाहबाट कराँचीतर्फ जाँदै थियो ।
तर, उडानका क्रममा नेभिगेसन प्रणालीमा समस्या आएपछि यसको हवाई ट्राफिक नियन्त्रण (एटीसी) सँगको सम्पर्क टुटेको थियो । प्रारम्भिक विवरणअनुसार विमान कराँचीको दक्षिण–पश्चिमस्थित अरब सागरमा दुर्घटनाग्रस्त भएको आशंका गरिएको छ । हाल समुद्रमा व्यापक खोज तथा उद्धार अभियान सञ्चालन भइरहेको छ ।
कसरी भयो दुर्घटना ?
पाकिस्तान विमानस्थल प्राधिकरणका अनुसार, पाकिस्तानी समयअनुसार राति ९ः१८ बजे कराँचीतर्फ उड्दै गर्दा विमानले नेभिगेसन प्रणालीमा समस्या आएको जानकारी दिएको थियो । त्यसपछि स्थानीय हवाई ट्राफिक नियन्त्रणले विमानलाई मार्गनिर्देशन गर्ने प्रयास गरेको थियो । तर, करिब तीन मिनेटमै रडारमा विमान तीव्र गतिमा तल झर्दै गरेको देखियो र त्यसपछि सम्पूर्ण सञ्चार सम्पर्क टुट्यो ।
प्राधिकरणका अनुसार सम्पर्क टुट्दाका बेला विमान कराँचीबाट करिब १५५ समुद्री माइल (२८७ किलोमिटर) पश्चिममा रहेको थियो । स्थानीय सञ्चारमाध्यमका अनुसार विमान बलुचिस्तानको ओरमारा नजिक अरब सागरमाथि उडिरहेको अवस्थामा हराएको हो ।
फ्लाइट रडारको तथ्यांकले के देखायो ?
फ्लाइट ट्रयाकिङ सेवा फ्लाइट राडार २४ का प्रारम्भिक तथ्यांकअनुसार दुर्घटनाअघि विमानको उचाइमा असामान्य र ठूलो उतारचढाव देखिएको थियो । तथ्यांकले विमान पहिले तल झरेको, त्यसपछि केही समयका लागि फेरि माथि उक्लिएको र त्यसपछि अत्यन्त तीव्र गतिमा तल खसेको देखाएको छ । अन्तिम पटक प्राप्त तथ्यांकअनुसार विमान समुद्री सतहबाट केवल १,१०० फिट उचाइमा थियो र प्रतिमिनेट २२,४०० फिटको असामान्य दरले तल झरिरहेको थियो ।
२७ वर्ष पुरानो थियो विमान
सम्पर्कविहीन भएको विमान पाकिस्तानमा दर्ता गरिएको बोइङ ७३७–४०० मालवाहक विमान थियो । यसलाई के–२ एयरवेजले सञ्चालन गर्दै आएको थियो । २७ वर्ष पुरानो यो विमान उक्त कम्पनीको एक मात्र विमान थियो र सन् २०२४ देखि मात्र कम्पनीको सेवामा सञ्चालनमा आएको थियो । फ्लाइट राडार २४ का अनुसार, सन् २०१२ मा यसलाई यात्रुवाहकबाट मालवाहक विमानमा रूपान्तरण गरिएको थियो । यसअघि यो सन् १९९९ मा रुसको एयरोफ्लोट एयरलाइन्सबाट यात्रुवाहक विमानका रूपमा सञ्चालनमा आएको थियो ।
खोज तथा उद्धार अभियान जारी
पाकिस्तान विमानस्थल प्राधिकरणले सामाजिक सञ्जालमार्फत जानकारी दिँदै हराएको विमान र त्यसमा सवार चालक दलका सदस्यहरूको खोजीका लागि विभिन्न निकायको समन्वयमा समुद्रमा खोज तथा उद्धार अभियान सञ्चालन गरिएको जनाएको छ । यस घटनाबारे हालसम्म के–२ एयरवेज र बोइङ कम्पनीले कुनै आधिकारिक प्रतिक्रिया दिएका छैनन् ।
