: गृहमन्त्री सुधन गुरुङले प्रहरी कार्यालयका जीर्ण भवन तथा कमजोर भौतिक पूर्वाधारको सुधारलाई सरकारले प्राथमिकताका साथ अघि बढाउने बताएका छन् । बजेटको सीमितताका कारण निर्माण कार्यले अपेक्षित गति लिन नसकेको स्वीकार गर्दै उनले स्रोत व्यवस्थापन गरी प्रहरीका आवश्यक भवन निर्माणलाई तीव्रता दिइने प्रतिबद्धता जनाएका छन् ।
नेपाल–भारत सीमा क्षेत्रको सुरक्षा अवस्थाको स्थलगत अनुगमनका लागि शनिबार विराटनगर पुगेका गृहमन्त्री गुरुङले विराटनगर विमानस्थलमा सञ्चारकर्मीसँग कुरा गर्दै प्रहरी संगठनलाई प्रभावकारी बनाउन भौतिक पूर्वाधार मजबुत हुन अपरिहार्य रहेको बताए । देशका विभिन्न जिल्लामा रहेका प्रहरी कार्यालयका भवन जीर्ण अवस्थामा रहेको आफूलाई जानकारी भएको उल्लेख गर्दै उनले जीर्ण संरचनाको पुनः निर्माण तथा स्तरोन्नतिका लागि सरकारले योजना बनाइरहेको जानकारी दिए ।
उनले सरकारले प्रहरीका आवश्यक भवन निर्माणलाई प्राथमिकतामा राखेको भए पनि बजेट अभावका कारण केही आयोजना प्रभावित भएको बताए । अब उपलब्ध स्रोतको प्रभावकारी व्यवस्थापन गर्दै निर्माण कार्यलाई तीव्रता दिने तयारी भइरहेको उनको भनाइ थियो । स्रोतका अनुसार सीमा सुरक्षाको वास्तविक अवस्था बुझ्न स्थलगत निरीक्षण आवश्यक हुने भन्दै गृहमन्त्री गुरुङ कोशी प्रदेशको सीमावर्ती क्षेत्रमा आएका हुन् । नेपाल–भारत सीमाअन्तर्गत मोरङको सीमावर्ती क्षेत्रमा सुरक्षाको अवस्था, प्रहरी परिचालन, भौतिक पूर्वाधार, जनशक्ति व्यवस्थापन तथा आवश्यक सुधारका विषयमा सम्बन्धित सुरक्षा निकायसँग जानकारी लिने उनको योजना छ ।
गुरुङका अनुसार सीमा क्षेत्रमा देखिएका समस्या समाधान गर्दै सुरक्षा संयन्त्रलाई थप प्रभावकारी बनाउने, प्रहरीलाई आवश्यक स्रोत साधन उपलब्ध गराउने तथा सीमा व्यवस्थापनलाई थप सुदृढ बनाउने विषयमा गृह मन्त्रालय गम्भीर रूपमा अघि बढिरहेको छ । सीमा नाकामा हुने सम्भावित चोरी तस्करी नियन्त्रण, सुरक्षा निगरानी विस्तार तथा समन्वयलाई प्रभावकारी बनाउने विषय पनि अनुगमनको मुख्य उद्देश्य रहेको बताइएको छ ।
शनिबार बिहान काठमाडौंबाट बुद्ध एयरको विमानमार्फत विराटनगर विमानस्थल आइपुगेका गृहमन्त्री गुरुङले पहिलो चरणमा जिल्ला प्रशासन कार्यालय मोरङको निरीक्षण गरेका छन् । त्यसपछि उनले मोरङस्थित नेपाल–भारत सीमा क्षेत्रको स्थलगत अनुगमन गर्ने कार्यक्रम तय गरिएको छ ।
सुरक्षा स्रोतका अनुसार गृहमन्त्री गुरुङको भ्रमण मोरङमा मात्र सीमित रहने छैन ।
उनले सुनसरी जिल्लामा समेत आकस्मिक छड्के अनुगमन गर्ने कार्यक्रम रहेको छ भने आवश्यक सुरक्षा अवस्थाका बारेमा जानकारी लिन धनकुटासम्म पुग्ने कार्यतालिका बनाइएको छ । अनुगमनका क्रममा उनले सीमा नाकाको सुरक्षा व्यवस्थापन, प्रहरी परिचालन, सीमावर्ती क्षेत्रका गतिविधि, सम्भावित अवैध कारोबार तथा चोरी तस्करी नियन्त्रणका उपायका बारेमा सुरक्षा अधिकारीहरूसँग विस्तृत जानकारी लिने कार्यक्रम रहेको छ। साथै, जिल्लाको समग्र सुरक्षा अवस्थाको समीक्षा गर्दै आवश्यक निर्देशन समेत दिने तयारी रहेको सुरक्षा स्रोतले जनाएको छ ।
