: दक्षिण कोरियामा पछिल्लो एक महिनाको अवधिमा तीन नेपालीले विभिन्न घटनामा ज्यान गुमाएका छन् । २०८३ जेठ १५ देखि असार १३ सम्मको अवधिमा तीन जनाको मृत्यु भएको कोरियास्थित नेपाली राजदूतावासले जनाएको छ । सुनसरीको बराहक्षेत्र नगरपालिका–१०, प्रकाशपुर स्थायी घर भएका प्रकाश राई र ओखलढुंगाको मोलुङ गाउँपालिका–७ स्थायी घर भएका २९ वर्षीय गणेश थापाको सवारी दुर्घटनामा मृत्यु भएको हो । त्यस्तै रूपन्देहीको सैनामैना नगरपालिका स्थायी घर भएका आशिष अधिकारीको भने मृत्युको कारण पुष्टि हुन बाँकी छ ।
करिब १५ वर्षदेखि कोरियामा कार्यरत राईको जेठ ३१ गते दुर्घटनामा परी मृत्यु भएको थियो । उनी इ–७ भिसामा कोरियाको थाङजिन क्षेत्रमा कार्यरत थिए । उनको शव कार्यस्थल नजिकैको नहरमा फेला परेको हो । साँझपख साइकल चलाउने क्रममा साइकल नहरमा खसेर दुर्घटना हुँदा उनको मृत्यु भएको हो ।
त्यस्तै कोरियाको पोछन क्षेत्रमा कार्यरत ओखलढुंगाको मोलुङ गाउँपालिका–७ निवासी २९ वर्षीय गणेश थापाले जेठ १५ गते सवारी दुर्घटनामा ज्यान गुमाएका थिए । तीन वर्षअघि रोजगारीका लागि कोरिया आएका उनी कृषि क्षेत्र अन्तर्गत गाई फार्ममा कार्यरत थिए । फार्मका लागि आवश्यक सामग्री ल्याउन प्रयोग हुने सवारी साधन लिएर बजार गएको र फर्किने क्रममा दुर्घटनामा परी उनको मृत्यु भएको थियो । मृतक राई र थापाको शव नेपाल पठाइसकिएको राजदूतावासले जनाएको छ ।
त्यस्तै, कोरियाको ख्योङ्साङनाम प्रान्तस्थित सानचोङ क्षेत्रमा मृत अवस्थामा भेटिएका अधिकारीले आत्महत्या गरेको हुनसक्ने अनुमान गरिएको भएता पनि उनको मृत्युको कारण पुष्टि हुन भने बाँकी छ । करिब ३ वर्षअघि रोजगारीका लागि कोरिया आएका उनको घटनाबारे थप अनुसन्धान भइरहेको र शव पठाउने प्रक्रिया सम्बन्धित निकायमार्फत् अघि बढिरहेको छ । राजदूतावासले यहाँ रहेका नेपालीहरुलाई आफ्नो शारीरिक तथा मानसिक स्वास्थ्यप्रति सचेत रहन र केही समस्या भएमा तुरुन्तै राजदूतावास वा सरोकारवालाहरुसँग सम्पर्क गरेर समस्या समाधान गर्न आग्रह समेत गरेको छ ।
