: चरम गर्मीका कारण फ्रान्सको राजधानी पेरिसमा सार्वजनिक स्थानमा मदिरा सेवन र मदिरा बिक्रीमा अस्थायी प्रतिबन्ध लगाइएको छ। प्रशासनले एक सूचना जारी गर्दै सार्वजनिक स्थानमा मदिरा सेवन तथा बिक्रीमा प्रतिबन्ध लगाएको जानकारी गराएको हो।
जारी सूचनाअनुसार शुक्रबार दिउँसो १२ बजेदेखि शनिबार बिहान ७ बजेसम्म, शनिबार दिउँसो १२ बजेदेखि आइतबार बिहान ७ बजेसम्म सार्वजनिक स्थानमा मदिरा सेवन गर्न पाइने छैन।
त्यसैगरी,साथ लैजान मिल्ने (टेकअवे) मदिराको बिक्री पनि शुक्रबार साँझ ६ बजेदेखि शनिबार बिहान ७ बजेसम्म र शनिबार साँझ ६ बजेदेखि आइतबार बिहान ७ बजेसम्मका लागि रोक लगाइएको छ। यद्यपि, इजाजत प्राप्त बार र रेस्टुरेन्टहरूमा भने यो प्रतिबन्ध लागू हुने छैन।
फ्रान्सका प्रधानमन्त्री सेबास्टियन लेकोरनुले चरम गर्मीका कारण उच्चतम स्वास्थ्य सतर्कता जारी गरिएको बताएका छन्। उनका अनुसार अस्पतालहरूमा बढ्दो चापलाई व्यवस्थापन गर्न अतिरिक्त स्वास्थ्यकर्मी परिचालन गर्ने तथा जोखिममा रहेका नागरिकहरूको सुरक्षा सुनिश्चित गर्ने उद्देश्यले यस्तो निर्णय गरिएको हो।
यसैबीच,केही दिनदेखि स्पेन, बेलायत र फ्रान्सलाई प्रभावित गरिरहेको चरम गर्मीको लहर अहिले पूर्वी युरोपतर्फ फैलिँदै गएको छ। जर्मनी र चेक गणराज्यका मौसम निकायहरूले पनि अत्यधिक गर्मीको चेतावनी जारी गरेका छन्।
जर्मनीमा शुक्रबार तापक्रम ४० डिग्री सेल्सियससम्म पुग्ने अनुमान गरिएको छ भने चेक गणराज्यका अधिकांश क्षेत्रमा पनि अत्यधिक गर्मीको चेतावनी लागू गरिएको छ।
