: फिफा विश्वकप २०२६ अन्तर्गत समूह 'एफ' को खेलमा ट्युनिसियाविरुद्ध जित दर्ता गर्दै नेदरल्यान्ड्स समूह विजेताका रूपमा नकआउट चरणमा प्रवेश गरेको छ। कान्सास स्टेडियममा भएको खेलमा ट्युनिसियालाई ३-१ ले पराजित गर्दै नेदरल्यान्ड्स समूह 'एफ' को विजेता बनेको हो।
खेलको सुरुवाती तेस्रो मिनेटमा नै ट्युनिसियाले आत्मघाती गोल बेहोर्यो। ट्युनिसियाका एलिस स्खिरीले आफ्नै पोस्टमा गोल गरेपछि नेदरल्यान्ड्सले सुरुवाती अग्रता लिएको थियो। खेलको सातौँ मिनेटमा नेदरल्यान्ड्सका लागि ब्रायन ब्रोबीले भर्जिल भान डाइकको पासमा उत्कृष्ट गोल गरे।
पहिलो हाफमा २-० को अग्रता बनाएको नेदरल्यान्ड्सले दोस्रो हाफमा थप एक गोल गर्यो भने एक गोल बेहोर्यो। खेलको ५४औं मिनेटमा ट्युनिसियाका हाजिम मास्टौरीले गोल फर्काउँदै खेललाई २-१ को स्थितिमा ल्याए।
तर, खेलको ६२औं मिनेटमा नेदरल्यान्ड्सका जान पल भ्यान हेकेले गोल गर्दै टोलीलाई ३-१ को अग्रता दिलाए। अन्ततः यही गोल नै निर्णायक बन्दा नेदरल्यान्ड्सले ट्युनिसियामाथि ३-१ को जित पक्का गर्यो।
यस जितसँगै नेदरल्यान्ड्स समूह चरणका ३ खेलमा २ जित र १ बराबरका साथ ७ अंक जोड्दै शीर्ष स्थानमा रहन सफल भयो। नेदरल्यान्ड्ससँग पराजित भएसँगै ट्युनिसियाको विश्वकप यात्रा भने समाप्त भएको छ।
