: नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टी (रास्वपा)का नेता-कार्यकर्तालाई आफ्ना नेताहरूले गल्ती गर्दा प्रश्न गर्न सक्ने साहस राख्न आग्रह गरेका छन्।
रास्वपाको प्रथम महाधिवेशनलाई सम्बोधन गर्दै थापाले कांग्रेसले आफ्ना कमजोरी सच्याउन ढिलाइ गरेको स्वीकार गर्दै रास्वपाका कार्यकर्तालाई त्यही गल्ती नदोहोर्याउन सुझाव दिए। उनले भने, 'तपाईंका नेताहरूले गल्ती गर्छन् भने प्रश्न गर्नुहोला। हामीले ढिला गरेर गल्ती गर्यौं, तपाईंहरूले नगर्नुहोला। आफ्नै नेतालाई प्रश्न गर्ने आँट गर्नुहोला।'
सभापति थापाले रास्वपाले छोटो समयमै प्राप्त गरेको जनमतलाई ‘लोभलाग्दो’ भन्दै प्रशंसा गरे। चार वर्षको अवधिमै रास्वपाले हासिल गरेको जनसमर्थन नेपाली राजनीतिक इतिहासमा दुर्लभ भएको उल्लेख गर्दै उनले त्यसलाई सही दिशामा उपयोग गर्नुपर्ने बताए।
उनले इतिहासमा यस्ता जनमत प्राप्त गरेका दल र नेताहरू अहंकार, आन्तरिक टकराव तथा सत्ताको उन्मादका कारण दुर्घटनामा परेको स्मरण गराए। 'इतिहासमा तीन-चार पटक यस्तै जनमत आएको छ। तर, हरेक पटक नेताहरूको अहंकार र आपसी द्वन्द्वका कारण त्यो दुर्घटनामा पर्यो। यस्तो अवस्था रास्वपामा नहोस् भन्ने हाम्रो चाहना हो,' उनले भने।
थापाले कुनै दललाई कमजोर बनाएर होइन, आफूहरूलाई इमानदार र सक्षम बनाएर मात्रै राजनीतिक प्रतिस्पर्धामा अगाडि बढ्न चाहेको बताए। 'हामी तपाईंहरूको खुट्टा काटेर अग्लो हुन चाहँदैनौं। हामी सफा भएर, राम्रो काम गरेर तपाईंहरूभन्दा अग्लो हुन चाहन्छौं,' उनले भने।
संसदीय अभ्यासबारे चर्चा गर्दै थापाले विपक्षी दलको भूमिका केवल विरोध गर्ने नभई राष्ट्रिय हितका विषयमा साथ दिने पनि भएको बताए। सरकारले गलत गर्दा विरोध गर्ने र सही निर्णय गर्दा समर्थन गर्ने कांग्रेसको नीति रहेको उनको भनाइ थियो।
आफ्नो पार्टीतर्फ संकेत गर्दै थापाले विगतका वर्षहरूमा कांग्रेस सत्ता, गठबन्धन र चुनावी गणितमा बढी केन्द्रित भएको स्वीकार गरे। उनले पार्टीभित्र सुधार र आत्मसमीक्षाको आवश्यकता महसुस गर्दै आफूहरूले बाहिरी प्रतिस्पर्धाभन्दा आफ्नै घरभित्रको कमजोरीसँग लड्न खोजेको बताए।
