: सूचना तथा सञ्चारमन्त्री डा. विक्रम तिमिल्सिनाले सरकार पूर्ण प्रेस स्वतन्त्रताको पक्षमा रहेको बताएका छन् । प्रतिनिधिसभा बैठकमा बुधबार आफ्नो मन्त्रालयको विनियोजन विधेयकमाथिको छलफलमा उठेका प्रश्नको जवाफ दिदै मन्त्री तिमिल्सिनाले स्वतन्त्रतामाथि निरन्तर हस्तक्षेप भएको भन्ने सांसदहरुको प्रश्नमा सरकार पूर्ण प्रेस स्वतन्त्रताको पक्षमा रहेको जवाफ दिएका हुन् ।
उनले सरकार प्रेस स्वतन्त्रतामाथि हस्तक्षेप गर्ने कुनै पनि क्रियाकलापलाई सहन तयार नरहेको र कसैले प्रेस स्वतन्त्रतामाथि कुनै कदम उठाएको भए सरकार त्यसका विरुद्ध काम गर्न तयार रहेको प्रतिबद्धता समेत जनाए । आमसञ्चार क्षेत्रलाई मर्यादित, जवाफदेही र विश्वसनीय बनाउन नीतिगत तथा कानुनी सुधारका लागि ऐन कानुनमा समसामयिक संशोधन गर्न तथा नयाँ कानून तर्जुमा गर्ने काम सुरु भइरहेको उनले बताए ।
निजी सञ्चारमाध्यम र श्रमजीवि पत्रकारहरूको हक अधिकारको विषयमा आन्दोलनमा रहेको बिषयमा मन्त्री तिमिल्सिनाले सूचना तथा प्रसारण विभागमा यससम्बन्धी समस्या समाधानको लागि कार्य भइरहेको र बाँकी विषयहरूमा गम्भीरतासहित मन्त्रालय अघि बढेको जानकारी दिए । उनले मोबाइल नेटवर्कको गुणस्तर मूल्यांकन गरी सुधारका लागि नियमित रूपमा नेटवर्क अनुगमन, ड्राइभ टेस्ट र नेटवर्क अप्टिमाइजेसन जस्ता कार्य सञ्चालन गर्दै आइरहेको बताए ।
मन्त्री तिमिल्सिनाले ग्राहकका गुनासोका आधारमा समस्याको विश्लेषण गरी आवश्यक सुधारात्मक कार्यहरू कार्यान्वयन गर्दै सेवाको गुणस्तर अभिवृद्धि गर्ने काम समेत भएको उल्लेख गरे । साइबर सुरक्षा, डेटा अर्थतन्त्र, डिजिटल पूर्वाधार आर्थिक अर्थतन्त्रका मेरुदण्ड भएकोले प्रयाप्त बजेट छुट्याइएको उनको भनाइ छ ।
