: कोशी प्रदेश सरकारले आगामी आर्थिक वर्ष २०८३/८४ का लागि ४० अर्ब ४४ करोड ९८ लाख रुपैयाँ बराबरको बजेट सार्वजनिक गरेको छ। बजेट चालु आर्थिक वर्षको तुलनामा १२.७४ प्रतिशतले बढी रहेको बताइएको छ।
सोमबार बसेको प्रदेशसभा बैठकमा आर्थिक मामिला तथा योजनामन्त्री विदुरकुमार लिङ्थेपले आगामी आर्थिक वर्षको आय-व्ययको अनुमानित विवरण प्रस्तुत गर्दै बजेट सार्वजनिक गरेका हुन्। सरकारले प्रस्तुत गरेको कूल बजेटमध्ये चालुतर्फ १३ अर्ब ९७ करोड ६३ लाख रुपैयाँ विनियोजन गरेको छ भने पुँजीगततर्फ २० अर्ब ७५ करोड ९९ लाख रुपैयाँ छुट्याइएको छ।
त्यस्तै वित्तीय व्यवस्थापन शीर्षकमा १५ करोड रुपैयाँ विनियोजन गरिएको छ। बजेटको संरचना हेर्दा चालु खर्चको हिस्सा ३४.५५ प्रतिशत रहेको छ। पुँजीगत खर्चतर्फ ५१.३२ प्रतिशत बजेट विनियोजन गरिएको छ। वित्तीय व्यवस्थापनतर्फ ०.३७ प्रतिशत हिस्सा रहेको छ।
प्रदेश सरकारले विकास निर्माणका कार्यक्रमलाई प्राथमिकता दिएको संकेतस्वरूप पुँजीगत बजेटको हिस्सा चालु खर्चभन्दा उल्लेख्य रूपमा बढी राखेको छ।
आगामी आर्थिक वर्षको बजेट कार्यान्वयनका लागि सरकारले विभिन्न स्रोतबाट राजस्व तथा अनुदान प्राप्त हुने अनुमान गरेको छ। बजेटका लागि आन्तरिक राजस्वबाट ५ अर्ब ५० करोड रुपैयाँ संकलन हुने अनुमान गरिएको छ।
त्यस्तै राजस्व बाँडफाँटबाट १२ अर्ब ८७ करोड रुपैयाँ प्राप्त हुने अपेक्षा गरिएको छ। त्यसैगरी, संघीय सरकारबाट प्राप्त हुने समानीकरण अनुदान ९ अर्ब १२ करोड रुपैयाँ रहने अनुमान गरिएको छ। सशर्त अनुदानतर्फ ५ अर्ब ९५ करोड रुपैयाँ प्राप्त हुने प्रक्षेपण गरिएको छ। समपूरक अनुदानमार्फत ६४ करोड रुपैयाँ प्राप्त हुने सरकारको अनुमान छ।
प्रदेश सरकारले प्रस्तुत गरेको बजेटले विकास निर्माण, पूर्वाधार विस्तार, सेवा प्रवाह सुधार तथा आर्थिक गतिविधि प्रवर्द्धनलाई केन्द्रमा राखेको छ। प्रदेशसभामा विस्तृत छलफल भएपछि बजेट पारित प्रक्रियामा जानेछ।
