: फिफा विश्वकप २०२६ अन्तर्गत समूह जी को दोस्रो खेलमा इरान र न्यूजिल्यान्डले बराबरी खेल्दै अंक बाँडेका छन्। लस एन्जल्स स्टेडियममा भएको खेलमा इरान र न्यूजिल्यान्डले २–२ बराबरी खेलेका हुन्।
पहिलो हाफ १–१ बराबरीमा रोकिएको खेल दोस्रो हाफमा पनि १–१ गोल हुँदा बराबरीमा सकिएको हो। न्यूजिल्यान्डका लागि एलिजाह जस्टले पहिलो गोल गरेका हुन्। उनले इरानी पेनाल्टी एरियामा बललाई नियन्त्रणमा लिए र त्यसलाई पोस्टको दिशा दिए ।
खेलको ३२ औं मिनेटमा इरानले बराबरी गोल फर्कायो। इरानका लागि रामिन रेजाइएनले गोल गरेका हुन्।
पहिलो हाफको थप गरिएको ६ मिनेटको पाँचौं मिनेटमा इरानले गरेको हेडर गोल अफसाइड घोषणा गरिएको हो। जसका कारण पहिलो हाफ १–१ बराबरीमा सकिएको थियो।
खेलको ५५ औं मिनेटमा न्यूजिल्यान्डले दोस्रो गोल गरेको हो। न्यूजिल्यान्डको लागि एलिजाह जस्टले गोल गरेका हुन्। क्रिस वुडको उत्कृष्ट क्रस पासमा उनले राम्रो फिनिस गरे। न्यूजिल्यान्डका लागि विश्वकपमा २ गोल गर्ने जस्ट पहिलो खेलाडी बनेका छन्।
खेलको ६४ औं मिनेटमा इरानले बराबरी गोल फर्कायो। इरानका लागि मोहम्मद मोहेबीले उत्कृष्ट हेडरमार्फत गोल गरेका हुन्। उनलाई रामिन रेजाएइयनले निकै राम्रो असिस्ट गरेका थिए।
खेल बराबरीमा सकिए पनि युद्धका कारण विश्वकप खेल्ने अनिश्चित रहेको इरानले विश्वकपमा अंक जोडेको छ। आज भएका ३ वटै खेल बराबरीमा सकियो। आजको पहिलो खेलमा बेल्जियम र इजिप्टले १–१ गोल गरे। दोस्रो खेलमा पनि साउदी र उरुग्वेले १–१ को बराबरी खेल्दै अंक बाँडेका हुन्।
