— अमेरिका र इजरायलले इरानविरुद्ध सुरु गरेको युद्ध आज १०० औँ दिनमा प्रवेश गरेको छ।

युद्ध जारी रहँदा र युद्धविरामका लागि भइरहेका वार्ताहरू निष्कर्षमा पुग्न सकेका छैनन्। विभिन्न सर्वेक्षणहरूले अमेरिकी जनतामाझ यो युद्धप्रति नकारात्मक धारणा रहेको देखाएका छन्।

युद्धप्रति जनसमर्थनको अभावले राष्ट्रपति डोनाल्ड ट्रम्प र उनको रिपब्लिकन पार्टीलाई राजनीतिक रूपमा दबाबमा पार्न सक्ने देखिएको छ। युद्ध सुरु हुनुअघि नै अधिकांश अमेरिकी नागरिक इरानमाथि सैन्य कारबाहीको विपक्षमा रहेको जनमत सर्वेक्षणले देखाएको थियो। युद्ध सुरु भएपछि पनि जनधारणामा उल्लेखनीय परिवर्तन आएको छैन।

युद्धसम्बन्धी अध्ययन र सर्वेक्षणमा संलग्न मेरील्याण्ड विश्वविद्यालयका शान्ति तथा विकास अध्ययनका प्राध्यापक शिब्ली तेलहामीका अनुसार धेरै अमेरिकीहरूले यो युद्धले अमेरिकी हितको रक्षा गरेको विश्वास गरेका छैनन्।

युद्धप्रति बढ्दो असन्तुष्टिले ट्रम्प प्रशासनका लागि थप चुनौती सिर्जना गर्न सक्ने आकलन गरिएको छ। आगामी नोभेम्बरमा हुने मध्यावधि निर्वाचनमा डेमोक्र्याटहरूले कांग्रेसमा पुनः बहुमत हासिल गर्ने लक्ष्य राखेका छन्। त्यसो भएमा ट्रम्प प्रशासनको बाँकी कार्यकालका नीति तथा योजनाहरू कार्यान्वयनमा कठिनाइ आउन सक्ने बताइएको छ।

ads/1440x233ekantipurcomcombinesummerkv-0462026073435.jpg
बिहीबार सार्वजनिक गरिएको एक सर्वेक्षणअनुसार केवल १६ प्रतिशत अमेरिकी मतदाताले अमेरिका युद्धमा जितिरहेको वा जितिसकेको विश्वास गरेका छन्। यसले राष्ट्रपति ट्रम्पले बारम्बार गर्दै आएको विजयको दाबीप्रति आम अमेरिकी जनता आश्वस्त नभएको संकेत गरेको छ।

सर्वेक्षणले अधिकांश मतदाताले युद्धले अमेरिकी हितमा सकारात्मकभन्दा बढी नकारात्मक प्रभाव पारेको ठानेको देखाएको छ। यस धारणा राख्नेमा ३३ प्रतिशत रिपब्लिकन समर्थकसमेत रहेका छन्।

यता केवल १२ प्रतिशत उत्तरदाताले भने युद्धको प्रभाव नकारात्मकभन्दा बढी सकारात्मक रहेको बताएका छन्। यस्तो धारणा राख्ने रिपब्लिकन समर्थकको अनुपात २५ प्रतिशत रहेको सर्वेक्षणमा उल्लेख छ।

अमेरिका–इरान युद्धमा अहिलेसम्म के–के भयो?

अमेरिका र इजरायलले फेब्रुअरी २८ मा इरानमाथि बमबारी सुरु गरेका थिए, जसमा सर्वोच्च नेता अली खामेनी मारिएका थिए।

यसको जवाफमा इरानले इजरायल र क्षेत्रका विभिन्न स्थानहरूलाई लक्षित गर्दै मिसाइल तथा ड्रोन आक्रमण गरेको थियो। साथै, इरानले ऊर्जा ढुवानीका लागि अत्यन्त महत्वपूर्ण समुद्री मार्ग मानिने हर्मुज क्षेत्र बन्द गरिदिएको थियो। यसका कारण विश्व बजारमा तेल र ग्यासको मूल्य तीव्र रूपमा बढेको थियो।

अप्रिल ६ मा अमेरिका र इरानबीच युद्धविराम सम्झौता भए पनि बेला–बेलामा झडपहरू भइरहेका छन्। साथै, हर्मुज क्षेत्रमा इरानको अवरोध अझै हटेको छैन। उता अमेरिकाले पनि इरानी बन्दरगाहहरूमा आफ्नै नौसैनिक घेराबन्दी कायम राखेको छ।