: इरानका सर्वोच्च नेता मोज्तबा खामेनीले दुश्मन हारिसकेको टिप्पणी गरेका छन् । खामेनीले एक लिखित सन्देश दिँदै यस्तो बताएका हुन् । इस्लामिक गणतन्त्र इरानका संस्थापक रुहोल्लाह खोमेनीको पुण्यतिथिका अवसरमा विगत छ वर्षदेखि तत्कालीन सर्वोच्च नेता अली खामेनीले सम्बोधन गर्दै आएका थिए । तर यस वर्ष भने इरानका सर्वोच्च नेता मोज्तबा खामेनीको लिखित सन्देश सार्वजनिक रूपमा वाचन गरिएको हो ।
यो सन्देश तेहरानका अस्थायी इमाम–ए–जुमा मोहम्मद जवाद हाज–अली–अकबरीले पढेर सुनाएका थिए । बीबीसी फारसीका अनुसार सन्देशमा भनिएको छ, ‘हाम्रा सशस्त्र बलका बहादुर जवानहरूको सामना गर्दा दुश्मनले पराजय भोग्नु परेको छ । विशेष गरी सैन्य मोर्चा, मैदान र सडकहरूमा दिइएको कडा प्रतिकारका कारण दुश्मनले गहिरो र अपमानजनक हार बेहोरेको छ ।’
सन्देशमा भनिएको छ, ‘दुश्मनले आफ्नो संयुक्त रणनीति दुई कुरामा केन्द्रित गरेको छ । पहिलो, जनताको धैर्य र सहनशीलतालाई कमजोर बनाउने र दोस्रो, देशका अधिकारीहरूको सोच तथा निर्णय प्रक्रियामा गल्ती उत्पन्न गराउने ।’ मोज्तबा खामेनीका अनुसार दुश्मनको सबैभन्दा ठूलो हतियार जनताबीच शंका, अविश्वास र विभाजन सिर्जना गर्नु हो ।
उनले दुश्मनका योजनाहरू असफल बनाउन जनतालाई एकताबद्ध रहन, आपसी विश्वास कायम राख्न र दृढ रूपमा संगठित हुन आह्वान गरेका छन् । जारी सन्देशमा थप भनिएको छ, ‘यी मूल्यहरूलाई बलियो बनाउन सरकारी अधिकारीहरूको भूमिका अत्यन्त महत्वपूर्ण छ । जनतामा निराशा, अविश्वास वा हतास पैदा गर्ने कुनै पनि कार्य देश र जनताका दुश्मनहरूलाई सहयोग गर्नु सरह मानिनेछ ।’
रिपोर्टका अनुसार अमेरिका र इजरायलका आक्रमणहरूपछि इरानका सर्वोच्च नेता सार्वजनिक रूपमा देखिएका छैनन् । उनको तर्फबाट केवल लिखित सन्देशहरू जारी गरिएका छन्, जसलाई अन्य व्यक्तिहरूले सार्वजनिक रूपमा पढेर सुनाउने गरेका छन् ।
