: ललितपुर जिल्ला अदालतले टिकटकर तुलसा अधिकारीलाई पुर्पक्षका लागि कारागार पठाउने आदेश दिएको छ। न्यायाधीश टेकनाथ गौतमको इजलासले अधिकारीलाई पुर्पक्षका लागि कारगार पठाउन आदेश दिएको हो।
थुनछेक बहसका लागि प्रहरीले अधिकारीलाई बिहीबार बिहान अदालत उपस्थित गराएको थियो।
उनलाई सुन्धारास्थित जगन्नाथ देवल कारागार पठाइएको अदालतका प्रवक्ता एवं सूचना अधिकारी टिकाध्वज कार्कीले अन्नपूर्णलाई जानकारी दिए। अधिकारी कार्कीले भने,'नख्खु कारागारमा महिलाको लागि छुट्टै व्यवस्था नभएपछि अधिकारीलाई जगन्नाथ देवल कारागार पठाइएको हो।'
कुमार चिमोरियाको जाहेरीले उनी पक्राउ परेकी हुन्। उनीविरुद्ध आपराधिक लाभ (एक्सटर्सन),संगठित अपराध र सम्पत्ति शुद्धीकरण (मनि लाउण्डरिङ)समेतको कसूरमा मुद्दा दायर भएको हो। उनीसहित १० जनालाई प्रतिवादी बनाइएको छ।
इन्टरपोलमार्फत रेड कर्नर नोटिस जारी भएपछि उनलाई थाइल्याण्डबाट पक्राउ गरी नेपाल ल्याएको थियो।
