: अमेरिकी राष्ट्रपति डोनाल्ड ट्रम्पले लेबनानमा जारी इजरायली सैन्य कारबाहीप्रति कडा आपत्ति जनाउँदै इजरायली प्रधानमन्त्री बेन्जामिन नेतान्याहुसँग तीव्र असन्तुष्टि व्यक्त गरेका छन्।
ट्रम्पले सोमबार नेतान्याहुसँग फोनवार्ता गर्दै आक्रोश पोखेका हुन्। अमेरिकी सञ्चारमाध्यम 'एक्सियोस'को रिपोर्ट अनुसार, आक्रोशित ट्रम्पले नेतान्याहुलाई 'पागल'सम्म भन्नुको साथै अपशब्द समेत प्रयोग गरेका थिए।
लेबनानमाथि इजरायलले गरेको आक्रमणपछि इरानले सोमबार एक चेतावनी जारी गरेको थियो। इरानले इजरायली सैन्य कारबाही नरोकिए अमेरिकासँग जारी वार्ता रद्द गर्न सक्ने चेतावनी दिएपछि ट्रम्प नेतान्याहुसँग क्रुद्ध बनेका हुन्। त्यसलगत्तै ट्रम्पले नेतान्याहुलाई फोन गरेका थिए।
सूत्रहरूका अनुसार ट्रम्पले आक्रोशित हुँदै भनेका थिए–'के तिमी पागल भएका हौ ? आखिर तिमी के गरिरहेका छौ ? मलाई एउटा गुन लगाऊ। यदि म नभएको भए तिमी अहिले जेलमा हुन्थ्यौ। म तिमीलाई बचाइरहेको छु, तर अहिले सबैजना तिमीसँग आक्रोशित छन्। इजरायलसँग पनि सबैको आक्रोश चुलिएको छ।'
अमेरिकी अधिकारीहरूका अनुसार लेबनानमा इजरायली आक्रमणका कारण ठूलो सङ्ख्यामा आम नागरिक मारिएको र हिजबुल्लाहका एक कमाण्डरलाई निशाना बनाउने बहानामा पूराका पूरा भवनहरू ध्वस्त पारिएको घटनाप्रति ट्रम्प विशेष रूपमा चिन्तित र आक्रोशित बनेका हुन्।
