: पूर्वाधार विकास मन्त्रालयको सचिवको कार्यकक्षमा अनधिकृत रूपमा प्रवेश गरी हुलहुज्जत तथा अभद्र व्यवहार गर्ने एक जना पक्राउ परेका छन्।
पक्राउ पर्नेमा कालिकोट घर भई भक्तपुरको मध्यपुर थिमिमा बस्दै आएका ३५ वर्षीय उपेन्द्र कुमार शाही रहेको प्रहरीले जानकारी दिएको छ।
प्रहरीका अनुसार शाहीले सोमबार बिहान साढे ११ बजे पूर्वसूचना तथा जानकारी बिना सिंहदरबारस्थित मन्त्रालयको सचिवको कार्यकक्षमा प्रवेश गरी हुलहुज्जत गर्ने, बाहिर जान आग्रह गर्दा अश्लील शब्द प्रयोग गर्ने तथा धाकधम्की दिएका थिए।
उनीमाथि 'आपराधिक लाभ लिन नहुने' कसूरमा काठमाडौं जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको प्रहरीले जनाएको छ।
