: अमेरिकी राष्ट्रपति डोनाल्ड ट्रम्पले फेरि इरानमाथि आक्रमण गर्न सक्ने संकेत दिएका छन् । अमेरिका र इरानबीच शान्ति सम्झौताका लागि भइरहेको वार्ता निष्कर्षमा नपुगे युद्धको खतरा अझै कायम रहेको अमेरिकी सञ्चारमाध्यम एक्सियोसले जनाएको छ ।
यदि अन्तिम समयको वार्ता असफल भयो भने ट्रम्पले इरानविरुद्ध नयाँ सैन्य आक्रमण सुरु गर्ने विषयमा ‘गम्भीरतापूर्वक विचार’ गरिरहेका रिपोर्टमा दावी गरिएको छ । यस विषयमा छलफल गर्न ट्रम्पले शुक्रबार बिहान राष्ट्रिय सुरक्षा टोलीका वरिष्ठ अधिकारीहरूको बैठक बोलाएका थिए ।
तेहरान पुगे पाकिस्तानी सेना प्रमुख
यसैबीच असिम मुनी इरानको राजधानी तेहरान पुगेका छन् । उनले शनिबार इरानको इस्लामिक रिभोल्युसनरी गार्ड कोरका कमाण्डर जनरल अहमद वाहिदीसँग भेट गर्ने अपेक्षा गरिएको छ । पाकिस्तानी विदेश कार्यालयका प्रवक्ता ताहिर अन्द्राबीले पाकिस्तानबाट इरान गएको ‘उच्चस्तरीय प्रतिनिधिमण्डल’ सम्बन्धी समाचारलाई न पुष्टि गरेका छन् न खण्डन ।
कतारको एक प्रतिनिधिमण्डलले पनि अन्तिम समयमा सम्झौता गराउने प्रयास गरिरहेको बताइएको छ । अमेरिकी अधिकारीहरूका अनुसार वार्ता ‘अत्यन्त चुनौतीपूर्ण’ बनेको छ र सम्झौताको मस्यौदा दैनिक रूपमा फेरबदल भइरहे पनि उल्लेखनीय प्रगति हुन सकेको छैन ।
परमाणु हतियार मुख्य विवाद
ह्वाइट हाउसमा भएको बैठकमा उपराष्ट्रपति जेडी भान्स, रक्षा मन्त्री पिट हेगसेथ, सीआईएका निर्देशक जोन रैटक्लिफलगायत सहभागी थिए । ट्रम्पले कार्यक्रममा बोल्दै भने, ‘इरान सम्झौता गर्न चाहन्छ, अब के हुन्छ हेर्न बाँकी छ । तर हामीले उनीहरूलाई कडा झट्का दिएका छौं । इरानसँग परमाणु हतियार हुन सक्दैन ।’ अमेरिकी विदेशमन्त्री म्याक्रो रुबियोले स्विडेनमा पत्रकारहरूसँग कुरा गर्दै इरानसँगको वार्तामा ‘सामान्य प्रगति’ भएको बताएका छन् ।
