: पाकिस्तान प्रशासित कश्मिरको राजधानी मुजफ्फराबादमा एक निजी कलेजका प्रिन्सिपल हमजा बुरहानको दिउँसै गोली हानी हत्या गरिएको छ । गोजरा क्षेत्रमा रहेको निजी कलेजका प्रिन्सिपल हमजा बुरहान हमलामा गम्भीर घाइते भएका थिए र सीएमएच अस्पतालमा उपचारका क्रममा उनको विहीबार मृत्यु भएको डीएसपी इश्तियाक गिलानीले बताएका छन् । प्रहरीका अनुसार, उनीमाथि कलेज अगाडि नै हमला गरिएको थियो। घटनापछि प्रहरीले कारबाही गर्दै अब्दुल्ला कमाल नामका एक व्यक्तिलाई पक्राउ गरेको छ ।
बिहीबार हमजा बुरहान गम्भीर घाइते भएको खबर आएपछि डीएसपी गिलानीले घटना पुष्टि गरेका थिए । हमजा बुरहान मुजफ्फराबादका बासिन्दा थिए । डीएसपी गिलानीका अनुसार, हमलापछि उनलाई तुरुन्त अस्पताल लगिएको थियो, जहाँ उपचारकै क्रममा उनको मृत्यु भएको थियो ।
हमलामा संलग्न भनिएका एक व्यक्तिलाई पाकिस्तानको पञ्जाबस्थित वाह क्यान्टबाट नियन्त्रणमा लिइएको छ । प्रारम्भिक अनुसन्धानले ती व्यक्ति आइतबार वाह क्यान्टबाट मुजफ्फराबाद आएको र स्थानीय होटलमा बसेको देखाएको छ ।
प्रहरीले भनेको छ, ‘हमजा आफ्ना केही साथीसँग कलेजबाट बाहिर आएका थिए । कुराकानीपछि जब उनी पुनः कलेजभित्र फर्किन लागेका थिए, त्यतिबेला उनको ढाडमा गोली हानियो । त्यसपछि थप गोली चलाइयो, जसमध्ये एउटा गोली उनको टाउकोमा लागेको थियो ।’ हमजा बुरहान अहमद मुजफ्फराबादको जुन निजी कलेजका प्रिन्सिपल थिए, त्यहाँको घटनापछि विद्यार्थीहरूले विरोध प्रदर्शन समेत गरेका थिए ।
कसरी भयो हमला ?
मुजफ्फराबादका प्रहरी अधीक्षक रियाज मुगलले घटनासम्बन्धी एफआईआर दर्ता गरिएको, तर थप विवरण दिन अस्वीकार गरे । सदर प्रहरी कार्यालयका अधिकारीहरूका अनुसार, दिउँसो १२ः१० बजे गोजरा बाइपासस्थित निजी कलेजका प्रिन्सिपलमाथि गोली प्रहार भएको सूचना प्राप्त भएको थियो । कलेजका एक सुरक्षा गार्डले बताएअनुसार, हमजा बुरहानले ‘मेरो केही पाहुना आउँदैछन्’ भन्दै मुख्य गेटतर्फ गएका थिए ।
गार्डका अनुसार, उनी भित्र रहेका बेला अचानक गोली चलेको आवाज सुनियो ।
बाहिर आएपछि उनले प्रिन्सिपललाई घाइते अवस्थामा लडिरहेको देखे। मुजफ्फराबादका डेपुटी कमिश्नर मुनीर कुरैशीले यो घटना ‘टार्गेट किलिङ’ भएको दाबी गरेका छन् । प्रत्यक्षदर्शीहरूका अनुसार, घटनापछि सडकमा यातायात अवरुद्ध भएको थियो र ठूलो भीड जम्मा भएको थियो । साँझ केही विद्यार्थीहरूले घटनाको विरोधमा प्रदर्शन समेत गरेका थिए । यो कलेज गोजरा बाइपास रोडमा अवस्थित छ, जुन इस्लामाबाद जाने मुख्य सडक हो । यो क्षेत्र अत्यन्त व्यस्त र बाक्लो बस्ती भएको स्थान मानिन्छ ।
को हुन् हमजा बुरहान ?
डेपुटी कमिश्नर मुनीर कुरैशीले भने, ‘घटनाको अनुसन्धान जारी छ । भारतीय मिडियाले यसलाई अत्यधिक प्राथमिकताका साथ प्रस्तुत ग¥यो । घटना भएको पाँच–दश मिनेटमै उनीहरूले हमजा पुलवामा हमलाको मास्टरमाइन्ड भएको प्रचार गर्न थाले ।’ उनका अनुसार, अहिले प्रहरी र सम्बन्धित निकायहरूले हमजा बुरहान वास्तवमा को थिए भन्ने विषयमा अनुसन्धान गरिरहेका छन् ।
तर मुजफ्फराबादका दुई वरिष्ठ सरकारी अधिकारीहरूलेहमजा बुरहानको सम्बन्ध भारत प्रशासित कश्ीिरसँग रहेको पुष्टि गरेका छन् । जब एसपी रियाज मुगललाई हमजा भारत प्रशासित कश्मिरका हुन् कि भनेर सोधियो, उनले केवल ‘उनी कश्मिरी थिए’ भन्ने जवाफ दिए । चरमपन्थी संगठनसँग कथित सम्बन्धबारे प्रश्न गर्दा उनले भने, ‘अहिलेसम्म त्यस्तो केही पुष्टि भएको छैन, अनुसन्धान जारी छ ।’
