: रुसी राष्ट्रपति भ्लादिमिर पुटिन र चिनियाँ राष्ट्रपति सी जिनफिङबीच द्विपक्षीय भेटवार्ता हुने भएको छ। युक्रेन र मध्यपूर्वको बढ्दो तनावपूर्ण भूराजनीतिक परिस्थितिका बीच हुन लागेको यस भेटवार्तामा आर्थिक सहकार्य, ऊर्जा सुरक्षा र समसामयिक भूराजनीति लगायतका व्यापक विषयहरूमा छलफल हुने अपेक्षा गरिएको अन्तराष्ट्रिय सञ्चारमाध्य अल ज-जरीले उल्लेख गरेकाे छ ।
मस्को र बेइजिङबीच बलियो रणनीतिक साझेदारी रहँदै आएको छ। हाल दुवै देशले आर्क्टिक क्षेत्रको अन्वेषण तथा आणविक ऊर्जा केन्द्रहरूको निर्माण र प्रविधि हस्तान्तरण जस्ता महत्त्वपूर्ण संयुक्त परियोजनाहरूमा सहकार्य गरिरहेका छन्। तीव्र आर्थिक विकास गरिरहेको चीनका लागि थप ऊर्जा स्रोतहरू सुरक्षित गर्नु अपरिहार्य बनेको छ भने रुस बेइजिङलाई आवश्यक ऊर्जा उपलब्ध गराउन पूर्ण रूपमा तयार देखिएको छ।
'पावर अफ साइबेरिया २' मा रुसको जोड
यस भ्रमणको मुख्य केन्द्रविन्दु लामो समयदेखि चर्चामा रहेको 'पावर अफ साइबेरिया २' ग्यास पाइपलाइन परियोजना रहने अनुमान गरिएको छ। रुसले विगत धेरै वर्षदेखि मङ्गोलिया हुँदै साइबेरियाको ग्यास भण्डारलाई चीनसँग जोड्ने यस महत्त्वाकाङ्क्षी परियोजनाका लागि चीनलाई सहमत गराउन प्रयास गरिरहेको छ। यो पाइपलाइन हाल सञ्चालनमा रहेका विद्यमान पाइपलाइनहरूको पूरकका रूपमा रहनेछ।
यदि राष्ट्रपति पुटिनले चिनियाँ पक्षलाई यो परियोजना अघि बढाउन राजी गराउन सकेमा, यसलाई रुसको ठुलो कूटनीतिक र आर्थिक सफलता मानिनेछ। यसैकारण पनि यस भ्रमण र वार्तालाई निकै चासोका साथ हेरिएको छ।
चिनियाँ नागरिकमाझ पुटिनको चर्चा
राष्ट्रपति पुटिनको यस भ्रमणलाई लिएर चीनमा निकै उत्साह देखिएको छ। आफ्नो बेइजिङ भ्रमणको पूर्वसन्ध्यामा पुटिनले चिनियाँ जनताका लागि जारी गरेको भिडियो सन्देश त्यहाँको स्थानीय सामाजिक सञ्जालमा भाइरल बनेको छ। सार्वजनिक भएको केही घण्टामै उक्त भिडियोले लाखौँ 'लाइक' पाएको छ, जसले रुस-चीन सम्बन्धप्रति चिनियाँ नागरिकको उच्च चासोलाई प्रस्ट पार्छ।
