: अमेरिकाको सान डिएगोमा भएको गोलीबारीबाट ३ जनाको मृत्यु भएको छ। क्यालिफोर्निया राज्यस्थित सान डिएगोको एक मस्जिदमा अन्धाधुन्ध गोली चल्दा एक सुरक्षा गार्ड र दुई किशोरको मृत्यु भएको अन्तर्राष्ट्रिय सञ्चार माध्यमहरूले जनाएका छन् ।
अधिकारीहरूले यो आक्रमण दुई किशोरद्वारा गरिएको हुन सक्ने प्रारम्भिक अनुसन्धानमा देखिएको बताएका छन्।
मस्जिदमा सञ्चालित एउटा विद्यालय सञ्चालन भइरहेको बेला गोलीबारी भएको थियो। सान डिएगो पुलिस प्रमुख स्कट वाहलले पत्रकार सम्मेलनमा घटनालाई घृणा अपराधको रूपमा अनुसन्धान गरिरहेको बताएका छन्। घटनास्थलमा नोट समेत भेटिएको छ। तर, सान डिएगोको इस्लामिक सेन्टरमा आक्रमण गर्ने एक संदिग्धको सुसाइट नोट र हतियारमा उल्लेख गरिएको कुनै पनि स्थानको लागि कुनै विशेष खतरा नभएको वाहलले बताए।
मस्जिदमा आक्रमण हुँदा त्यहाँ खटिएका सुरक्षाकर्मीले प्रतिकार गरेका थिए । सुरक्षा गार्डले प्रतिकार गर्दा थप क्षति हुन नपाएको बताइएको छ।
'सान डिएगोको इस्लामिक सेन्टरमा भएको गोलीकाण्डमा मारिएका तीन जनामध्ये एक सुरक्षा गार्ड आठ सन्तानका बुबा थिए जसले आफ्नो समुदायको गहिरो ख्याल राख्थे र मस्जिद भित्रका मानिसहरूलाई जोगाउन आफ्नो ज्यान बलिदान दिएका थिए', उनका साथी साम हमिदेहले भने।
यता सान डिएगोको इस्लामिक सेन्टरमा आक्रमण गर्नुअघि एक किशोर संदिग्धले आफ्नी आमाको घरबाट तीनवटा हतियार लिएर गएको प्रहरी प्रमुखले बताए। आमाले प्रहरीलाई आफ्नो छोरा र कार हराएको बताएकी थिइन्।
मस्जिदमा गोली चलाएपछि फरार भएका ती दुई किशोर नजिकैको सडकमा कारभित्र मृत अवस्थामा फेला परेका थिए । आक्रमणको पछाडिको उद्देश्यको बारेमा थप विवरणहरू सार्वजनिक गरिएको छैन।
