:विश्व स्वास्थ्य संगठन (डब्लुएचओ)ले कंगो र युगान्डामा फैलिएको इबोला भाइरस संक्रमणलाई विश्वव्यापी स्वास्थ्य संकटकाल घोषणा गरेको छ। डब्लुएचओले मध्य अफ्रिकाभर संक्रमण सीमापार फैलिन सक्ने उच्च जोखिम रहेको चेतावनी दिएको हो।
बुन्डिबुग्यो स्ट्रेनको इबोला भाइरसबाट फैलिएको यो संक्रमणका कारण हालसम्म कंगोको इटुरी प्रान्तमा मात्रै ८० जनाको शंकास्पद मृत्यु भएको छ। त्यहाँ आठ जनामा प्रयोगशालाबाट संक्रमण पुष्टि भएको छ भने २४६ शंकास्पद बिरामी भेटिएका छन्।
संक्रमण बुनिया,र्वामपारा र मोन्गब्वालु स्वास्थ्य क्षेत्रमा फैलिएको बताइएको छ। प्रारम्भिक परीक्षणमा उच्च संक्रमणदर देखिएकाले वास्तविक संक्रमित संख्या अझ धेरै हुनसक्ने स्वास्थ्य अधिकारीहरूको अनुमान छ।
डब्लुएचओका अनुसार यो प्रकोप असाधारण छ,किनभने बुन्डिबुग्यो स्ट्रेनविरुद्ध हालसम्म स्वीकृत खोप वा विशेष उपचार उपलब्ध छैन। इबोला जायर स्ट्रेनका लागि भने केही उपचार र खोप उपलब्ध छन्।
संक्रमण छिमेकी देश युगान्डामा समेत फैलिसकेको पुष्टि भएको छ। युगान्डाको राजधानी कम्पालामा कंगोबाट यात्रा गरेर आएका दुई जनामा संक्रमण पुष्टि भएको छ,जसमध्ये एक जनाको मृत्यु भइसकेको छ। त्यस्तै कंगोको Kinshasa मा पनि इटुरीबाट फर्किएका यात्रुमा संक्रमण पुष्टि भएको छ।
सन् १९७६ मा पहिलो पटक इबोला भाइरस पहिचान भएयता कंगोमा यो १७औँ प्रकोप हो। स्वास्थ्य विज्ञहरूका अनुसार मध्य अफ्रिकाको घना उष्णकटिबन्धीय जंगल भाइरसको प्राकृतिक स्रोत मानिन्छ। संक्रमित व्यक्तिको शारीरिक तरल पदार्थ वा दूषित सामग्रीको सम्पर्कबाट यो भाइरस फैलिने गर्छ।
इबोलाका सामान्य लक्षणमा ज्वरो, बान्ता, पखाला, शरीर दुख्ने तथा गम्भीर अवस्थामा रक्तस्राव हुने समस्या देखिन्छ। समयमै उपचार नपाए यो रोग घातक बन्न सक्छ। डब्लुएचओले पूर्वी कंगोसँग सीमा जोडिएका देशहरूमा थप संक्रमण फैलिन सक्ने जोखिम उच्च रहेको जनाएको छ। सीमा क्षेत्रमा आवतजावत जारी रहेकाले निगरानी प्रणालीमाथि थप दबाब परेको अधिकारीहरूको भनाइ छ।
