: श्रम संस्कृति पार्टीका अध्यक्ष एवं प्रतिनिधि सभा सदस्य हर्कराज राई (हर्क साम्पाङ) र राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीबीच प्रधानमन्त्री बालेन्द्र शाहको राजीनामाको विषयलाई लिएर राजनीतिक मतभेद देखिएको छ ।
सांसद राईले प्रधानमन्त्रीको राजीनामा माग गर्दै विज्ञप्ति जारी गरेपछि सांसद शाहीले त्यसको प्रतिवाद गर्दै सामाजिक सञ्जालमा एक स्टाटस जारी गरेका छन् । सांसद राईले प्रधानमन्त्री बालेन्द्र शाह संसदीय अभ्यासमा गैरजिम्मेवार देखिएको आरोप लगाउँदै पद त्यागको माग गरेका छन् । उनले प्रधानमन्त्रीले संसदको अपमान गरेको दाबी गर्दै मुख्य तीन कारण अगाडि सारेका छन् ।
पहिलो कारण बैसाख २८ गते राष्ट्रपतिले नीति तथा कार्यक्रम प्रस्तुत गरिरहँदा प्रधानमन्त्रीले सभा छोडेर बाहिरिएको, दोस्रो कारण बैसाख ३०-३१ गतेको छलफलमा उपस्थित नभई नजिकैको कार्यालयबाट लाइभ हेरेर बसेको तर जवाफ दिन नआएको र तेस्रो कारण जनताको सार्वभौम सदनलाई बेवास्ता गरेर पदमा बसिरहनु अनैतिक हुने र यसले संसदीय इतिहासमा कालो धब्बा लगाएको राईको ठहर छ ।
‘कर्तव्य पूरा गर्न नसक्नेले नैतिकताको आधारमा मार्ग प्रशस्त गर्नुपर्छ’, राईले विज्ञप्तिमा उल्लेख गरेका छन् । यसै विषयलाई लिएर सांसद ज्ञानेन्द्र शाहीले चार वटा बुँदामा प्रतिवाद गरेका हुन् । उनले सांसद राईको मागप्रति टिप्पणी गर्दै प्रधानमन्त्रीको राजीनामा माग्नुपर्ने कुनै औचित्य नरहेको बताएका छन् । उनले विगतका शक्तिहरूले देश लुटेको सन्दर्भ स्मरण गराउँदै वर्तमान सरकार जनमतबाट आएको स्पष्ट पारेका हुन् ।
ज्ञानेन्द्रले ३५ वर्षसम्म देश लुट्ने र भ्रष्टाचार गर्नेहरू विरुद्धको लडाइँका लागि जनताले अहिलेको शक्तिलाई मतदान गरेकाले त्यसको कदर हुनुपर्ने माग राखेका छन् । साथै उनले प्रधानमन्त्रीको राजीनामा भन्दा पनि उनलाई थप प्रजातान्त्रिक र संसदप्रति उत्तरदायी बनाउनु पर्नेमा शाहीको जोड छ । संसद जनताको आवाज सुनाउने सर्वोच्च मञ्च भएकाले प्रधानमन्त्री त्यहाँ जवाफदेही हुनुपर्ने तर पद नै त्याग्नुपर्ने अवस्था नरहेको उनको भनाइ छ ।
एक पक्षले संसदीय मर्यादा र प्रक्रियालाई मुख्य मुद्दा बनाएर राजीनामाको दबाब बढाइरहेको छ भने अर्को पक्षले राजनीतिक स्थिरता र जनमतको रक्षा हुनुपर्ने तर्क गरिरहेको छ । दुवै नेताको यो जुहारीले सदन र सडकमा नयाँ बहस सिर्जना हुने पक्का देखिएको छ । यसअघि संसदमा सांसद शाही र साम्पाङले सरकारको नीति तथा कार्यक्रमका विषयमा जवाफ दिन प्रधानमन्त्री स्वयम् आउनु पर्ने माग गर्दै नाराबाजी समेत गरेका थिए ।
